«Поўны хаос». Tesla не можа знайсці супрацоўнікаў на гігафабрыку ў Германіі

Паводле слоў супрацоўніка завода, з якім размаўляла выданне, праз дэфіцыт людзей там пануе «поўны хаос».

«Некаторых я не бачыў на працы тры тыдні за шэсць месяцаў. Многія пайшлі на бальнічны, бо матывацыя на нулі. Некаторыя адсутнічаюць праз хваробу даўжэй, чым працавалі», — адзначыў супрацоўнік.

Берлінская гігафабрыка — першы завод Tesla ў Еўропе. Афіцыйнае адкрыццё адбылося ў сакавіку. Тады Маск заявіў, што сёлета тут будзе выпушчана паўмільёна электракараў.

Аднак да мэтавых 5 тысяч аўто на тыдзень заводу пакуль яшчэ вельмі далёка. Замест 12 тысяч супрацоўнікаў, якіх першапачаткова планавалася наняць, тут працуе толькі 7 тысяч. Цяпер на сайце Tesla для Берліна адкрыта мінімум 400 вакансій, у тым ліку для рэкруцёра.

У мясцовым прафсаюзе Wired сказалі, што праблемы з пошукам і ўтрыманнем супрацоўнікаў у кампаніі таму, што яна нажыла сабе рэпутацыю непрывабнага працадаўцы. У чэрвені Bloomberg са спасылкай на прафсаюзы паведамляў, што Tesla плаціць супрацоўнікам на 20% менш, чым іншыя аўтавытворцы ў Германіі.

Tesla спрабавала вырашыць пытанне найманнем у Польшчы. Вакансіі зробленыя на польскай, але ад кандыдатаў усё адно патрабуюць ведаў нямецкай. Гэтая ініцыятыва таксама пакуль выявілася не надта паспяховай.