З'явіўся індэкс ШІ-замяшчэння: праграмісты — першыя на чарзе

Індэкс улічвае амаль 2,9 тысячы працоўных навыкаў і ацэньвае іх па двух крытэрыях: кагнітыўная складанасць — наколькі выкананне задачы патрабуе разважанняў, ведаў і практычнага меркавання, і наколькі гэта можна дэлегаваць ШІ; і фізічная неабходнасць — ці патрабуе навык прысутнасці чалавека або фізічнага дзеяння.

На аснове аналізу навыкі падзялілі на чатыры катэгорыі: мінімальная трансфармацыя, «асісціраваная» трансфармацыя, «гібрыдная» трансфармацыя і поўная трансфармацыя.

Даследаванне паказала, што 41% усіх навыкаў схільныя да найвышэйшай рызыкі трансфармацыі пад уздзеяннем ШІ. Больш за чвэрць (26%) вакансій, апублікаваных на Indeed за апошні год, могуць змяніцца «моцна», а яшчэ 54% — «памяркоўна», у залежнасці ад хуткасці ўкаранення тэхналогій і гатоўнасці супрацоўнікаў да перакваліфікацыі.

Амаль палова (46%) навыкаў у тыповай вакансіі ўжо знаходзяцца ў зоне «гібрыднай трансфармацыі»: ШІ здольны выконваць значную частку рутынных задач, але неабходны чалавечы нагляд. Варта адзначыць, што ўпершыню за час даследавання 19 навыкаў (0,7%) прызнаны «вельмі верагодна цалкам заменнымі» ШІ — год таму такіх не было.

Больш за ўсё змены закрануць распрацоўку праграмнага забеспячэння: Indeed падлічыў, што 81% звязаных з ёй навыкаў пяройдуць у гібрыдны рэжым, дзе ШІ выконвае асноўную працу, а людзі кантралююць вынік. На другім і трэцім месцах — Data & Analytics і бухулік.

Менш за ўсё схільныя да трансфармацыі прафесіі, якія патрабуюць фізічнай прысутнасці і чалавечага ўзаемадзеяння. У гэтую групу трапілі догляд за дзецьмі, медсястрынская справа і будаўніцтва. У гэтых сферах ШІ ў асноўным здольны аптымізаваць толькі адміністрацыйныя працэсы.

Эканамісты Indeed адзначаюць: гаворка не ідзе пра татальную замену работнікаў машынамі. Аднак па меры росту магчымасцяў ШІ больш навыкаў будзе пераходзіць у катэгорыю рэалістычнай аўтаматызацыі.