«Прыёрбанк» увёў суперкамісію па валютных рахунках — амаль $4K у месяц

Так, «Прыёрбанк» з 1 красавіка ўвёў штомесячную плату за сэрвіснае абслугоўванне валютных рахункаў кліентаў, якія трымаюць у банку буйныя сумы. Новы збор закранае сродкі, якія захоўваюцца ў далярах, еўра, злотых, фунтах стэрлінгах, швейцарскіх франках і шведскіх кронах.

Мінімальны парог, з якога спаганяецца плата, складае $30 тысяч. У такім выпадку камісія складзе 500 рублёў у месяц. Для кліентаў, якія трымаюць у банку ад $1 млн, яна дасягне 12 тысяч рублёў у месяц. Грошы будуць спісвацца з любога рахунку кліента, адкрытага ў банку, незалежна ад яго валюты і тыпу.

Акрамя таго, з 1 красавіка перагледзеў камісію за пераводы ў далярах у іншыя фінансавыя ўстановы «Тэхнабанк». Яна складае $30 + 1% ад сумы пераводу, але не больш за $350. Спагнанне можа адбывацца ў беларускіх рублях па курсе Нацбанка на дзень аплаты.