Пракуратура запатрабавала вярнуць заснавальніка FTX Бэнкмана-Фрыда ў турму: ён цісне на сведак

Прадстаўніца пракуратуры Даніэль Сасун запатрабавала адклікаць заклад Бэнкмана-Фрыда ў памеры $250 мільёнаў і вярнуць яго ў турму. Яна абвінаваціла падазраванага ва ўцечцы асабістага дзённіка былога СЕО кампаніі Alameda Research Кэралайн Элісан і супрацоўніцтве са СМІ. Паводле слоў Сасун, так Бэнкман-Фрыд спрабуе дыскрэдытаваць аднаго з галоўных сведак у справе.

Элісан прызнала сябе вінаватай у снежні мінулага года і актыўна супрацоўнічае са следствам. Суддзя Люіс Каплан пастанавіў, што ўсім удзельнікам працэсу забаронена абмяркоўваць справу з прэсай. Бакі атрымалі час да 3 жніўня, каб абмеркаваць сітуацыю. Пасля гэтага суд прыме рашэнне наконт меры папярэдняга ўтрымання абвінавачанага.

Раней пасля арышту Бэнкмана-Фрыда злавілі на выкарыстанні месенджара Signal. Пасля гэтага пракуратура запатрабавала вярнуць бізнэсоўца ў турму. У выніку Бэнкману-Фрыду дазволілі мець зносіны з былымі і цяперашнімі супрацоўнікамі FTX, але пад кантролем уладаў.