Распрацоўшчыкі пачалі прадаваць «псіхадэлікі» для чат-ботаў

Праект запусціў шведскі распрацоўшчык і крэатыўны дырэктар маркетынгавага агенцтва Valtech Radon Петэр Рудваль. Ён сабраў справаздачы пра псіхадэлічныя перажыванні і навуковыя даследаванні аб уздзеянні псіхаактыўных рэчываў, а затым напісаў набор інструкцый, якія ўмешваюцца ў логіку працы моўнай мадэлі. У гэтым годзе Рудваль стварыў сайт Pharmaicy — пляцоўку, якую называе «Silk Road для ШІ-агентаў».

Для працы модуляў патрабуецца платная версія ChatGPT, паколькі яна дазваляе запампоўваць файлы, якія змяняюць паводзіны мадэлі. Па словах Рудваля, такія «дозы» дапамагаюць «разблакаваць крэатыўнасць» чат-бота і аслабіць яго рацыянальныя абмежаванні. Праект ужо знайшоў першых пакупнікоў, у асноўным дзякуючы рэкамендацыям у Discord і сарафаннаму радыё.

Некаторыя карыстальнікі сцвярджаюць, што «пад рэчывамі» чат-боты сапраўды становяцца больш эмацыйнымі і свабоднымі ў адказах. Спецыялістка ў сферы ШІ і заснавальніца стартапа Saga Studios  Ніна Амджадзі распавяла ў інтэрв’ю Wired, што яе бот пад «аяуаскай» выдаваў больш незвычайныя і смелыя бізнес-ідэі, чым звычайна. Іншыя эксперты называюць гэта забаўным, але павярхоўным эксперыментам, які толькі змяняе стыль вываду тэксту, а не стварае сапраўдны «змененны стан».

Філосафы і даследчыкі ШІ падкрэсліваюць, што гаворка ідзе хутчэй пра ролевую гульню. Па іх словах, псіхадэлікі дзейнічаюць на суб’ектыўны досвед і свядомасць, а ў ШІ яго проста няма. Нават калі адказы выглядаюць «адухоўленымі», гэта вынік маніпуляцый параметрамі мадэлі, а не ўнутранага перажывання.