РБК: колькасць вакансій у расійскім ІТ вырасла на 10% за год

Паводле даных аналітыкаў, найбольш высокі попыт назіраецца ў наступных сегментах распрацоўкі і праграмавання, укаранення і суправаджэння софту, інжынірынгу, інфармацыйнай бяспекі і аналітыкі.

Акрамя таго, у ІТ-сферы хутчэй за іншых расце зарплатная прапанова: за год яна павялічылася на 7,9% у намінальным выражэнні без уліку інфляцыі. У параўнанні са студзенем аплата працы ІТ-спецыялістаў ужо павялічылася на 5,2%.

Сярод ІТ-спецыялістаў больш за ўсё выраслі заробкі, прапанаваныя сістэмным архітэктарам — на 16,7%. Ім прапануюць у сярэднім 350 тысяч RUB ($3517) на месяц (на рукі, пасля выплаты падаткаў, без уліку бонусаў, дадатковых ільгот і кампенсацый), а максімальна — 600 тысяч RUB ($6029).

Праграмістам Java прапануюць плаціць адпаведна 300 тысяч RUB у сярэднім і 500 тысяч RUB максімальна (+11,1% за год). DevOps-інжынерам гатовыя плаціць 500 тысяч RUB максімальна і 280 тысяч RUB у сярэднім (+12%). Праграмістам Python і PHP прапануюць 270 тысяч RUB у сярэднім і 550 тысяч RUB максімальна (+8%). Зарплатная прапанова для распрацоўшчыкаў Android за год таксама вырасла на 8%: у сярэднім ім прапануюць 270 тысяч RUB, а максімальна — 500 тысяч RUB.

У мінулым годзе ў топ-7 найбольш запатрабаваных напрамкаў сярод ІТ-спецыялістаў уваходзілі інжынірынг, распрацоўка софту, сістэмнае адміністраванне, кіраванне прадуктамі/праектамі, укараненне і суправаджэнне софту, аналітыка і інфармацыйная бяспека/абарона інфармацыі.

Гадавы прырост сярэдніх рынкавых заробкаў у Маскве ў ІТ-галіне да мінулага снежня склаў 16,5%.

Зрэшты, зусім нядаўна іншы папулярны расійскі джабборд HeadHunter маляваў некалькі іншую карціну мясцовага ІТ-рынку. У ліпені CNews паведамляў, што ІТ-сфера ў краіне больш не расце, а колькасць вакансій падае.