У Расіі склалі рэйтынг ІТ-працадаўцаў Беларусі. На першых месцах расійцы, EPAM толькі пяты

У апытанне патрапілі не толькі класічныя ІТ-бізнэсы (але і банкі, маркетплэйсы, сотавыя аператары). Як растлумачылі ў ECOPSY, кампанія вывучыла ўсіх працадаўцаў са штатам ІТ-спецыялістаў ад 50 чалавек, якія наймаюць айцішнікаў — то-бок канкуруюць за ІТ-кадры. У фінальны рэйтынг увайшлі 33 кампаніі «са сфармаваным ІТ-брэндам».

На першым месцы ў рэйтынгу апынуўся расійскі Т-Банк (экс-Тинькофф). Пры рэйтынгу пазнавальнасці брэнда ў 45% Т-банк, па выніках апытання, мае самы высокі рэйтынг прывабнасці брэнда (89%).

У мінулым годзе Т-Банк заявіў аб адкрыцці вялікага ІТ-хаба ў Мінску на 900 чалавек і росце штату ў Беларусі ў найбліжэйшыя гады да 2 тысяч супрацоўнікаў. Сярод дзейных рэзідэнтаў ПВТ фігуруе «Тинькофф Цэнтр Распрацоўкі» (ад снежня 2021 года).

На другім месцы — Альфа-Банк (заснаваны расійцамі, з’яўляецца часткай кіпрскага холдынгу), трэцяе месца ў «Яндэкса».

Толькі на чацвёртае месца трапіла ІТ-кампанія з беларускімі каранямі — ISsoft. EPAM апынуўся на пятым месцы па прывабнасці (пры гэтым у кампаніі самая высокая ў рэйтынгу пазнавальнасць). 

Усяго ў першай дзясятцы апынулася 6 ІТ-кампаній з беларускімі каранямі. Цікава, што кампанія X-labs, якая была зарэгістраваная ў Мінску летам 2023 годзе, па прывабнасці брэнда абышла ў топе-10 даўно вядомыя кампаніі LeverX, SaM Solutions і IBA IT Park. Пры гэтым рэйтынг пазнавальнасці брэнда X-labs — усяго 13%.

Усяго ў рэйтынгу расійцаў толькі 15 ІТ-кампаній з беларускімі каранямі, амаль усе — аўтсорс. Самы нізкі ўзровень прывабнасці выявіўся ў Innowise і BelHard — усяго 11%.

У выніковы рэйтынг пры гэтым не патрапілі многія вядомыя прадуктовыя кампаніі, якія працягваюць працаваць у Беларусі. Напрыклад, у топе-33 не было Lesta Games. У ECOPSY ўдакладнілі, што Lesta была ў лонг-лісце, але пра яе не сабралася дастатковай колькасці «галасоў» для трапляння ў рэйтынг. 

Як складаўся рэйтынг

Для складання рэйтынгу ECOPSY правяла ў верасні-лістападзе мінулага года анкетнае апытанне 1208 ІТ-спецыялістаў. Усяго было даследавана 120 кампаній з колькасцю ІТ-спецыялістаў  большай за 50, якія наймаюць супрацоўнікаў у Беларусі («як адкрыта, так і скрытна»).

• Большасць апытаных — мідлы (38%) і сеньёры (25%). 
• Мужчыны — 71%, жанчыны — 29%.
• 84% апытаных пражываюць у Мінску.
• Больш за 50% апытаных — спецыялісты ва ўзросце 25-35 гадоў.
• Большасць апытаных — распрацоўшчыкі (38%), тэсціроўшчыкі (17,6%), аналітыкі (15,1%).

Для складання першаснага лонг-ліста ўдзельнікаў выкарыстоўвалася інфармацыя з сайтаў кампаній, кар’ерных старонкі, Linkedin. Таксама вывучаліся вакансіі на rabota.by і інфармацыя пра кампаніі на devby.io. Акрамя таго, у складанні лонг-ліста ўдзельнічалі «запрошаныя эксперты, у тым ліку з ІТ».

Было выкарыстана 38 крытэраў ацэнкі, якія «былі адаптаваныя пад спецыфіку рынку РБ сумесна з экспертамі: HRD, менеджарамі па развіцці брэнда працадаўцы ды іншымі».

1. На першым этапе рэспандэнтам прапаноўвалі выбраць з пададзеных лагатыпаў тыя кампаніі, якія яны знаюць. Так разлічвалася пазнавальнасць.
2. Затым лагатыпы знаёмых кампаній траплялі на наступны этап. Рэспандэнту трэба было выбраць найлепшых і найгоршых на яго думку працадаўцаў (гэта магло быць на ўзроўні чутак і міфаў; працаваць у кампаніі, каб мець пра яе меркаванне, неабавязкова).
3. Партрэт кампаніі. Рэспандэнтаў прасілі суаднесці выбраныя раней кампаніі з канкрэтнымі крытэрамі. Так высвятляліся асацыяцыі ІТ-спецыяліста з працадаўцамі.

У выніковы спіс патрапілі працадаўцы, якіх ацанілі ад 30 разоў (сума адзнак як пра «найлепшага» працадаўцу і як пра «найгоршага») — калі пра кампанію набралася менш за 30 адзнак, лічыцца, што ў яе пакуль не сфармаваны ІТ-брэнд працадаўцы. То-бок спецыялісты пакуль не могуць адказаць на пытанне, «ці добры гэта працадаўца, ці не», растлумачылі ў ECOPSY.

З гэтай жа прычыны ў выніковы рэйтынг не патрапілі кампаніі, якія закрылі найманне, не падаюць «прыкмет жыцця», а большасць былых супрацоўнікаў (якія былі «носьбітамі ведаў пра кампанію») з’ехала.