Рэклама і SEO-смецце сапсавалі пашукавікі: ChatGPT, Perplexity і нават ШІ Google шукаюць інфармацыю лепш

Напрыклад, калі спытаць Google, колькі каштуе iPhone 16 Pro, у выдачы спачатку давядзецца праскроліць чатыры рэкламныя спасылкі, карусель з рэкламай і блок з падобнымі запытамі іншых карыстальнікаў. Пры гэтым ChatGPT, Microsoft Copilot, Perplexity і Claude ад Anthropic умеюць шукаць інфармацыю ў сетцы ў рэжыме рэальнага часу і выдаваць адказы са спасылкамі. Google таксама тэстуе ШІ-рэжым унутры пашукавіка.

Чат-боты паказалі сябе лепш за олдскульны пошук у запытах на разнастайныя тэмы: пакупкі, людзі, рэцэпты, інструкцыі, рэкамендацыі фільмаў і сэрвісаў для іх прагляду. Яны пазбаўляюць карыстальніка ад спісу спасылак і прапануюць тыя рэсурсы, якія найбольш рэлевантныя для юзера і на якія ён, хутчэй за ўсё, пяройдзе.

Напрыклад, журналісты задалі ўсім чат-ботам адно і тое ж пытанне: які 3D-прынтар да $500 лепш купіць сямігадоваму дзіцяці:

• ChatGPT выдаў пяць варыянтаў з кароткім апісаннем, выявамі і спасылкамі на крыніцы.
• Claude прапанаваў чатыры варыянты са спасылкамі, у тым ліку на тэхналагічнае выданне Tom’s Hardware і асабісты блог аглядальніка 3D-прынтараў.
• Perplexity быў найбольш наглядным — бот склаў параўнальную табліцу з коштамі і характарыстыкамі трох мадэляў.
• Copilot даў два варыянты са спасылкамі і прапанаваў адсочваць кошты.
• Базавая бясплатная мадэль Gemini 2.0 Flash ад Google пералічыла лепшыя мадэлі, але без спасылак. У эксперыментальным ШІ-рэжыме пашукавіка быў паказаны той жа спіс з трох варыянтаў, але больш падрабязны і са спасылкамі.

Класічны пошук Google даў менавіта тое, што ад яго чакалі: рэкламныя спасылкі, рэкламаваныя прадукты, старонкі Best Buy і Amazon, відэа на YouTube. Bing ад Microsoft быў «не лепш».

Паводле дадзеных Adobe, у лютым трафік з генератыўных чат-ботаў на сайты амерыканскіх рытэйлераў вырас у 13 разоў у параўнанні з ліпенем мінулага года. 39% рэспандэнтаў апытання сярод 5000 спажыўцоў у ЗША ўжо выкарыстоўвалі генератыўны ШІ для онлайн-пакупак, а 53% плануюць зрабіць гэта ў 2025 годзе.

WSJ адзначае, што для простых запытаў — калі першы дзень вясны або фінал серыяла «Раздзяленне» — дастаткова адказу чат-бота. Калі трэба, напрыклад, пачытаць падрабязную біяграфію чалавека або зразумець, чаму баліць спіна, лепш перайсці па спасылцы на крыніцу. Журналісты прызнаюць, што слепа давяраць сённяшнім чат-ботам нельга, і для важных запытаў па значных тэмах варта правяраць інфармацыю.

Аднак ёсць рэчы, з якімі Google пакуль спраўляецца лепш. Напрыклад, ён хутчэй знаходзіць старонку, існаванне якой карыстальнік ужо ведае — профіль акцёра на IMDb або калегі ў LinkedIn. Таксама Google дакладней за ботаў паказвае карты, адрасы і гадзіны працы ўстаноў.

Кампанія разумее, што будучыня пошуку за ШІ, і інтэгруе яго ў свой пашукавік — ужо з’явіліся ШІ-рэзюмэ і эксперыментальны ШІ-рэжым, які аб’ядноўвае вынікі пошуку з адказамі Gemini. Але карыстальнікі не зусім задаволеныя. На пытанне, навошта столькі варыянтаў, віцэ-прэзідэнт па прадуктах Google Search Робі Стайн адказаў, што для розных мэт патрэбны «розны досвед».

Адзін з мінусаў чат-ботаў у тым, што яны рэдка заахвочваюць юзераў звяртацца да першакрыніц, дадаюць у WSJ, але ў цэлым рэкамендуюць іх для пошуку. Perplexity і ChatGPT ужо маюць пашырэнні для Chrome і Edge, якія дадаюць іх ботаў у пошукавы радок. А Perplexity рыхтуе ўласны браўзер.