Reuters: OpenAI дамаглася прарыву ў стварэнні моцнага АІ перад звальненнем Альтмана

Сярод іншых прэтэнзій, якія рада дырэктараў выставіла Альтману, быў праект Q*. Міра Мураці, якая ненадоўга заняла пасаду гендырэктаркі пасля Альтмана, у лісце супрацоўнікам прызнала існаванне гэтага праекта і папярэдзіла пра цікавасць СМІ да яго.

Некаторыя супрацоўнікі OpenAI лічаць, што праект Q* можа стаць прарывам у распрацоўцы моцнага штучнага інтэлекту (AGI), здольнага выконваць задачы, не саступаючы чалавеку.

Новая мадэль навучылася вырашаць матэматычныя задачы, пакуль на ўзроўні вучня пачатковай школы. Аднак пры наяўнасці дастатковых вылічальных рэсурсаў даследчыкі ўпэўненыя, што навучанне будзе хуткім.

Мінус генератыўнага АІ палягае ў тым, што яго адказы на адное і тое ж пытанне могуць значна адрознівацца. Поспехі ў галіне матэматыкі, дзе можа быць толькі адзін правільны адказ, могуць казаць пра наяўнасць у АІ значных здольнасцяў на капыл чалавечага інтэлекту.