Расійскія інвестары падалі пазоў супраць Atomic Wallet праз узлом на $100 млн

Група каля з 50 кліентаў Atomic Wallet з Расіі і краін СНД падае калектыўны пазоў праз страту $12 мільёнаў пасля ўзлому гаманца. Да ўзлому могуць быць датычныя паўночнакарэйскія або ўкраінскія хакеры. Паводле слоў адвакатаў пацярпелых, кожны з кліентаў уклаў розныя сумы, якія вар'іруюцца ад $150-200 тысяч да $1-2 мільёнаў.

Atomic Wallet — некастадыяльны крыптагаманец. Асабістыя даныя і сродкі кліентаў у ім захоўваюцца без пасярэдніцтва трэцяга боку. Сэрвіс быў запушчаны ў 2017 годзе як абменнік крыптавалют. Паводле даных кампаніі, гаманцом карыстаюцца больш за 5 мільёнаў кліентаў. Масавыя крадзяжы сродкаў адбыліся ў чэрвені гэтага года. Шкода ад узлому перавысіла $100 мільёнаў.

Таксама калектыўны пазоў падалі амерыканскія кліенты платформы. У Atomic Wallet заявілі, што «робяць усё магчымае», каб вярнуць скрадзеныя сродкі. Сярод патэнцыйных прычын кампанія называла вірус на прыладах карыстальнікаў, парушэнне інфраструктуры, атаку пасярэдніка або ўкараненне шкоднага кода.