Моцна больш, чым год таму. Даведаліся, колькі ў Беларусі айцішнікаў з заробкам 10 000+ рублёў
У Беларусі працягвае павялічвацца колькасць «найбагацейшых» айцішнікаў (з заробкам 10 000+ рублёў). За апошні год іх стала больш амаль на чвэрць. Хутчэй за ўсё, «дапамог» беларускі рубель, якія слабее, і долар, які расце.
Афіцыйная статыстыка Белстата па памеры заробкаў не ахоплівае ўсёй галіны. Нагадаем, што Белстат ад 2023 года не публікуе інфармацыі пра медыянны заробак айцішнікаў у Беларусі і дае толькі агульную статыстыку па сектары «інфармацыя і сувязь».
Асаблівасці ўліку спецыялістаў па ўзроўні заробкаў
Звесткі пра колькасць працаўнікоў розных відаў дзейнасці па ўзроўні заробкаў Белстат публікуе два разы на год — за май і лістапад.
Каго ўлічваюць: спецыялістаў, якія працавалі на працоўнай дамове (кантракце) у буйных і сярэдніх кампаніях і якія выконвалі пастаянную або часовую працу.
Каго не ўлічваюць: спецыялістаў, якія былі на бальнічным, у адпачынках без захавання зарплаты, а таксама ў адпачынках па цяжарнасці і родах і доглядзе дзіцяці да 3 гадоў.
Даныя па заробках паказваюцца да выплаты падаткаў і сацыяльных унёскаў, пры гэтым улічваюцца стымулюючыя і кампенсавальныя выплаты.
Для разліку медыяннага заробку за лістапад 2024 года Белстат выкарыстаў інфармацыю пра даходы амаль 60 тыс. спецыялістаў, якія працавалі ў ІТ і сувязі.
За апошні год (ад лістапада 2023) колькасць занятых спецыялістаў у сектары «інфармацыя і сувязь», па якіх Белстат аналізуе медыянны заробак, вырасла на 4,5%. Гэта звязана са скарачэннем звальненняў у галіне і ростам наймання. За мінулы год кампаніі ІТ і сувязі ўпершыню за тры гады нанялі больш спецыялістаў, чым звольнілі.
З заробкам да 1000 рублёў — мінус 30%
Летась прадоўжылася тэндэнцыя зніжэння ў галіне колькасці спецыялістаў з нізкімі заробкамі і росту — з высокімі.
- Так, за год у сектары «інфармацыя і сувязь» стала амаль на 30% менш супрацоўнікаў, якія атрымліваюць да 1000 рублёў. Гэта самае вялікае зніжэнне сярод усіх катэгорый спецыялістаў у залежнасці ад узроўню заробку.
- Амаль на 20% скарацілася колькасць спецыялістаў з заробкам ад 1000 да 2000 рублёў. Калі ў лістападзе 2023 года такі заробак атрымлівалі амаль 11 тысяч спецыялістаў, то ў лістападзе 2024 года крыху больш за 9 тысяч.
- У галіне стала больш спецыялістаў, якія атрымліваюць месячны заробак у памеры большым за 2000 рублёў. Больш за 13,5 тысяч спецыялістаў атрымлівае ад 2000 да 3000 рублёў. За год такіх супрацоўнікаў у галіне стала больш на 4,5%.
- А больш за ўсё спецыялістаў у галіне (14,7 тыс. чалавек) маюць заробак ад 3000 да 5000 рублёў. За год колькасць такіх працаўнікоў вырасла на 15%.
- Больш за 11 тысяч спецыялістаў зарабляе на месяц ад 5000 да 10 000 рублёў. Але колькасць такіх працаўнікоў за год змянілася мінімальна.
Айцішнікаў з заробкам 10 000+ рублёў — амаль 9 тысяч
Больш за ўсё за апошні год павялічылася колькасць спецыялістаў у галіне з заробкам большым за 10 000 рублёў. Раней (да 2023 года, пакуль Белстат публікаваў такую статыстыку) каля 98% прадстаўнікоў сектара «ІТ і сувязь» з такімі заробкамі працавалі непасрэдна ў ІТ-кампаніях. Малаверагодна гэтая тэндэнцыя моцна змянілася з тых часоў.
Калі ў лістападзе 2023 года заробак большы за 10 000 рублёў мела крыху больш за 7 тысяч супрацоўнікаў ІТ-кампаній, то ў лістападзе мінулага года Белстат налічыў у індустрыі амаль 9 тысяч працаўнікоў з такім заробкам (+23,1%).
Усяго ў галіне ўжо амаль 15% спецыялістаў з заробкам большым за 10000 рублёў. Год таму такіх было 12,4%.
Вось як змянілася за апошні год доля спецыялістаў у залежнасці ад узроўню заробку. Самая вялікая катэгорыя спецыялістаў (24,5%) атрымлівае ад 3000 да 5000 рублёў. Год таму больш за ўсё было працаўнікоў з заробкам ад 2000 да 3000 рублёў.
Чаму айцішнікі «багацеюць»?
Верагодна, адная з асноўных прычын павелічэння колькасці найбагацейшых айцішнікаў — рост курса долара.
У прыватнасці, у лістападзе 2024 года ў параўнанні з лістападам 2023 года толькі сярэдні курс долара (паводле даных Нацбанка) падаражэў больш як на 8%. У ІТ-кампаніях, якія выплачваюць заробкі ў прывязцы да валюты, розніца паміж курсамі магла быць яшчэ вышэйшай. У выніку толькі за кошт курсавых розніц частка айцішнікаў перамясцілася ў катэгорыю супрацоўнікаў з заробкам 10+ тысяч рублёў.
На думку экспертаў, яшчэ адная верагодная прычына — рэальны перагляд заробкаў самых вопытных спецыялістаў, якія дамагаюцца павышэння на фоне адтоку кваліфікаваных кадраў. Дарэчы, у лістападзе мінулага года сярэдні заробак у цэлым па ІТ-сектары вырас адносна лістапада 2023 года больш чым на 7%.
Плюс, верагодна, прыход расійскіх кампаній з грашыма таксама мог паўплываць на даходы высокааплачваных спецыялістаў.
Читать на dev.by