Позва, ужонд. Выбіраем слова года беларускіх айцішнікаў

Гамарджоба

Ці нават вось так: გამარჯობა. Для многіх айцішнікаў з Беларусі грузінскае прывітанне стала звыклым.

Самазаняты

Гэта той, кім мог бы стаць распрацоўшчык-ІП пасля скасавання спрошчанай сістэмы падаткаабкладання ў 2023 годзе. Але не стане, бо ўлады, насуперак абяцанням, не дазволілі айцішнікам працаваць з выплатай падатку на прафесійны даход.

Ужонд

Месца паломніцтва рэлакантаў у Польшчы. Яны там здабываюць песэль, мельдунэк ды іншыя радасці польскага жыцця.

Прадоўжаныя візы

З’ява, якая з’явілася дзякуючы пандэміі і шчодрасці палякаў. Беларусы ж прызвычаіліся да думкі, што візы/карты побыту будуць жыць да апошняга віруса кароны, але нядаўна Польшча вырашыла адвязаць тэрмін дзеяння дакументаў ад эпідсітуацыі. Зрэшты, візы і спадзевы яшчэ трываюць.

Падатковы рэзідэнт 

Гэта проста і складана. Увесь год айцішнікі вылічвалі свой рэзідэнцкі статус (а прынцып 183 дзён, выяўляецца, працуе не заўжды), вывучалі пагадненні аб пазбяганні двайнога падаткаабкладання, спрабуючы зразумець, каму і колькі падаткаў вінныя. Высновы часам атрымліваліся так сабе, але папярэджаны значыць узброены.

Запіс на візу (хоць якую)

Бясспрэчны мем 2022-га. Аж да канца лістапада запісацца ў ВЦ было чэленджам: скрыпты ўжо не працавалі, чарга ў PAIH рухалася павольна, і толькі асобныя турфірмы і прыватныя дапамагатары рабілі магію за вялікія грошы. У польскіх ВЦ развіднелася раптоўна: проста рэгістраваць наведвальнікаў сталі праз Міжбанкаўскую сістэму ідэнтыфікацыі (МСІ). Дапамагатары пайшлі прэч, даты з’явіліся.   

Апастыль 

Яшчэ адзін жаданы дакумент 2022-га для тых, хто ўжо з візай (або мае намер яе неўзабаве атрымаць). Дорага і доўга. Ну, вы памятаеце, як гэта было ўвесну.

Позва 

Антонім апастыля. Яе ніхто не жадаў, хоць яна бясплатная і раптоўная. Застаецца важным фактарам трывогі.

Пашпарт 

Біяметрычны, старога ўзору, паскораны, які заўгодна, але толькі каб у консульстве. Замена дакументаў стала важным пытаннем для многіх беларусаў у 2022-м. А хтосьці нават адчуў дыскрымінацыю праз сваё грамадзянства. Зычым, каб у новым годзе ваш пашпарт быў у парадку.

Трымайцеся 

Слова-код, якое нам часта даводзілася выкарыстоўваць у гэтым годзе. Можа, яно і не палягчае жыцця адрасата, але дорыць крышачку цяпла. Будзьма трымацца і надалей.

Дадавайце свае словы года ў каменты.