Архітэктар распрацаваў AI-трэнажор для няёмкіх размоваў. Напрыклад, аб заробку (або «хуткай невялікай змене»)

Натрэніраваць софт скілы «не складаней, чым развіць слых у чалавека, якому мядзведзь наступіў на вуха, — гэта рэальна», — кажа архітэктар, тэхлід і CTO Дзмітрый Сухаў. Ён ужо год працуе над трэнажорам софт скілоў SoftSkillz.

«Калі можна развіць слых, то што ўжо казаць пра софт скілы»

Дзмітрый Сухаў кажа, што на стварэнне аплікацыі яго натхнілі ў тым ліку пасты на LinkedIn, у якіх эйчары скардзіліся, што не могуць знайсці чалавека ў каманду:

— Па хард скілах усё выдатна, пісалі яны, а вось «сафты прасядаюць: людзі зусім не ўмеюць камунікаваць, заказчыку іх не пакажаш», — тлумачыць Дзмітрый.

І атрымліваецца: раней была праблема знайсці добрага распрацоўшчыка з веданнем англійскай, а зараз — таго, хто мог бы сваю добрую англійскую ўжываць на практыцы, даносіць думку і аргументы да іншага.

Дзмітрый упэўнены, што софт скілы можна трэніраваць, і прыводзіць у прыклад свой досвед:

— InnoWise, дзе я працаваў раней, запрашае для сваіх супрацоўнікаў эксперта, які чытае курс па развіцці камунікатыўных навыкаў, — вельмі карысна: распрацоўшчыкі вучацца рабіць прэзентацыі, разбіраюць прыёмы эфектыўнай камунікацыі з заказчыкамі. Я, напрыклад, даведаўся для сябе шмат новага.

Скажу больш: я лічу, што любы навык можна натрэніраваць, — працягвае наш суразмоўца. — У дзяцінстве мяне не бралі ў хор, таму што я жахліва фальшывіў і перашкаджаў астатнім хлопцам (хоць я вельмі стараўся). Выкладчыкі казалі: «Займіся чымсьці іншым — табе мядзведзь на вуха наступіў». А зараз я вельмі добра спяваю — мае песні ўжо гадоў пяць круцяцца на радыё «Сталiца». 

Так што калі можна развіць слых, то што ўжо казаць пра софт скілы, — рэзюмуе Дзмітрый.

«Дапусцім, PM злавіў у калідоры і просіць аб „хуткай невялікай змене"»

Працу над аплікацыяй пачаў год таму, перад гэтым правёў маркетынгавае даследаванне — і зразумеў, што «ніша ёсць, а нешматлікія сэрвісы карыстаюцца попытам». 

— І гэта лагічна: у лічбавую эпоху, калі людзі ў асноўным камунікуюць у месэнджарах — і па большай частцы кароткімі тэкставымі паведамленнямі, — навыкі камунікацыі, як і адпаведныя «трэнажоры» з кожным годам будуць набываць усё большае значэнне.

Большай папулярнасцю карыстаюцца галасавыя прадукты, але ў Дзмітрыя галасавая версія з 3D-аватарамі пакуль у планах (хутчэй за ўсё з’явіцца праз год) — зараз ён зрабіў тэкставую.

CTO і архітэктар, які не можа з’ехаць, паўгода шукае працу. Ён «занадта кваліфікаваны»

Па тэме

CTO і архітэктар, які не можа з’ехаць, паўгода шукае працу. Ён «занадта кваліфікаваны»

Апісваючы SoftSkillz, Дзмітрый кажа, што гэта свайго роду «трэнажорная зала», дзе можна «адрэпетаваць нязручную размову» і навучыцца весці дыялог, «дамагаючыся пры гэтым вырашэння сваіх пытанняў — нават тых, аб якіх раней было сорамна ці няёмка казаць».

— Дапусцім, нейкі абстрактны распрацоўшчык баіцца папрасіць павысіць яму зарплату (хоць пытанне даўно наспела) — не ведае, як увогуле падысці да менеджара. Калі ласка, у нас у сэрвісе ёсць такі сцэнар і некалькі варыянтаў персанажаў, кожны з якіх будзе адыгрываць сваю ролю: менеджар, які абараняецца, агрэсіўны, яшчэ якія-небудзь. 

У аплікацыі ёсць «трэнер» (ці «real time coach»), які дае падказкі карыстальніку, — дзякуючы ім той можа адточваць сваё красамоўства. Кожны дыялог у самой аплікацыі ацэньваецца па пяці метрыках:

• актыўнае слуханне, 
• вырашэнне праблемы, 
• самавалоданне 
• эмпатыя, 
• яснасць і сцісласць.

Кожная сесія ў сімуляцыі ўнікальная, кажа Дзмітрый: раз за разам ШІ змяняе сцэнары — падзеі заўсёды развіваюцца крыху па-іншаму. «Гэта вучыць карыстальніка адказваць не па шаблоне, а змяняць тактыку ў залежнасці ад пазіцыі, якую займае суразмоўца, гэта значыць адаптавацца, як у жыцці».

Зараз у сімулятары 323 сцэнары і вялікая колькасць раздзелаў: «workplace» і «HR» пра пошук працы і вырашэнне працоўных жа сітуацый; «call-center» і «sales department» — для працы са скаргамі і пярэчаннямі кліентаў; «C-level» і «entrepreneur» — у якім можна паспрабаваць звольніць свайго першага супрацоўніка, альбо патлумачыць партнёру па бізнесе, чаму трэба змяніць бізнес-стратэгію.

Партнёр Дзмітрыя і дырэктар па продажах SoftSkillz Андрэй Вольхін у мінулым — псіхолаг і НЛП-трэнер, ён непасрэдна ўдзельнічаў у працы над сцэнарамі.

Самая вялікая колькасць сцэнараў прадумана для распрацоўшчыкаў: 

• «выкруціцца з сітуацыі, калі на мітынгу пакуль не ведаеш, як тэхнічна вырашыць задачу, а каманда ціснe і патрабуе агучыць дэдлайн па ёй»;
• «адказаць прадуктоваму менеджару, калі той злавіў цябе ў калідоры і просіць аб хуткай невялікай змене»;
• «не пакрыўдзіць калегу, які просіць аб дапамозе на „тэрміновым“ пабочным праекце, у той час як ты загружаны»;
• «разабрацца з праблемай, калі карыстальніцкая гісторыя, прызначаная вам у спрынце, расплывістая і не мае выразных крытэрыяў прыёмкі»;
• «прэзентаваць ідэю праекта на хакатоне і пераканаць іншых распрацоўшчыкаў далучыцца да тваёй каманды»;
• «прызнаць памылку, калі ваша змена зламала зборку бесперапыннай інтэграцыі для ўсёй каманды».

6 месяцаў фултайма і 6 тысяч даляраў укладанняў

Укладанні ў праект Дзмітрый ацэньвае ў 6 месяцаў фултайм-працы і 6 тысяч даляраў, якія пайшлі на інфраструктуру, ШІ і «абкатку» сцэнараў, а таксама на іншыя патрэбы.

SoftSkillz ужо прайшоў закрытае і адкрытае тэставанне, на перыяд софт лонча Дзмітрый і Андрэй надалі прэміум-доступ усім зарэгістраваным карыстальнікам.

Папрасілі растлумачыць, у чым розніца паміж прэміум- і звычайным акаўнтам.

— Звычайнаму карыстальніку даступна пяць сесій у месяц — гэта значыць ён можа пяць разоў пачаць любы сцэнар (або адзін і той жа, калі ён так хоча), пры гэтым тры — з «трэнерам». А далей давядзецца чакаць наступнага месяца.

Платны або прэміум-тарыф прадугледжвае неабмежаванае выкарыстанне, і пры гэтым яму заўсёды даступны «трэнер» у рэжыме рэальнага часу. Плата за прэміум-доступ складае 29,99 долараў або 89 рублёў у месяц (за падпіску адразу на паўгода прадугледжана зніжка). Пошукам інвестараў каманда пакуль не заклапочана, але «адкрыта для прапаноў».

Зараз SoftSkillz — гэта вэб-аплікацыя, выпуск мабільнага сэрвісу асобна не плануецца. Дзмітрый «не бачыць у ім сэнсу» на этапе MVP. 

У чым адрозненне прадукту ад сэрвісаў канкурэнтаў? Дзмітрый кажа, што іншыя AI-трэнажоры працуюць толькі на англійскай (у SoftSkillz акрамя англійскай закладзена руская).

— Плюс усе яны нацэлены на карпаратыўны сектар: звычайны карыстальнік не можа проста ўзяць і зарэгістравацца — патрэбны працоўны e-mail, а далей патрабуецца запыт ад самой карпарацыі, дзе ён працуе. І не факт, што яго ўхваляць.

«Закрытаму хлопцу будзе несалодка». Як айцішнікі развіваюць софт-скілы сваіх дзяцей — 3 кейсы

Па тэме

«Закрытаму хлопцу будзе несалодка». Як айцішнікі развіваюць софт-скілы сваіх дзяцей — 3 кейсы