Бум штучнага інтэлекту імкліва ўзбагачае супрацоўнікаў ШІ-стартапаў. Паводле дадзеных платформы Levels.fyi, некаторыя інжынеры і менеджары робяцца мультымільянерамі ўсяго праз год пасля пачатку працы.
Бум штучнага інтэлекту імкліва ўзбагачае супрацоўнікаў ШІ-стартапаў. Паводле дадзеных платформы Levels.fyi, некаторыя інжынеры і менеджары робяцца мультымільянерамі ўсяго праз год пасля пачатку працы.
Адзін з найбольш паказальных прыкладаў звязаны з кампаніяй Anthropic. Паводле дадзеных Levels.fyi, інжынер, які далучыўся да стартапа ў канцы 2024 года, атрымаў пакет з 60 000 опцыяў з цаной выканання $13 за акцыю, калі кампанія ацэньвалася прыблізна ў $18 мільярдаў. Тады вартасць яго долі на паперы складала каля $200 000 у год.
Аднак пасля нядаўняй угоды па продажы акцый, якая ацаніла Anthropic амаль у $350 мільярдаў, сітуацыя рэзка змянілася. Нават з улікам размывання долі і іншых фактараў супрацоўнік ужо можа валодаць прыкладна $4-5 мільёнамі ў акцыях. Поўны пакет опцыяў, які звычайна размяркоўваецца штоквартальна на працягу чатырох гадоў, зараз можа каштаваць $18-20 мільёнаў.
Напрыклад, адзін старэйшы інжынер-распрацоўшчык назапасіў каля $1,6 мільёна ў вэставаных акцыях (якія ўжо канчаткова належаць супрацоўніку) за першы год працы. Больш дасведчаны супрацоўнік атрымаў прыкладна $8 мільёнаў за 18 месяцаў, а кіраўнік напрамку бізнес-аперацый — не менш за $9 мільёнаў за два гады.
Эксперты адзначаюць, што значная частка гэтай вартасці можа сысці на падаткі, асабліва для супрацоўнікаў, якія жывуць у Каліфорніі. Тым не менш хуткасць назапашвання капіталу ўсё роўна ўражвае. Раней падобныя багацці звычайна з’яўляліся толькі праз 5-10 гадоў і пасля выхаду кампаніі на біржу.
«Самы важны фактар, які ўплывае на памер даходу, амаль заўсёды — гэта кампанія, у якой вы працуеце, нават важней за вашу пасаду», — адзначыў аналітык Levels.fyi Хакім Шыблі. Па меры росту рынку ШІ і канкурэнцыі за спецыялістаў удзел у стартапе ўсё часцей становіцца самым хуткім спосабам разбагацець у тэхналагічнай індустрыі.
Рэлацыраваліся? Цяпер вы можаце каментаваць без верыфікацыі акаўнта.