ЗША ў 2-4 разы паднялі мыту на кітайскія электракары, чыпы, акумулятары, іншыя тавары

Сярод іншага, сёлета зменяцца пошліны на:

• сонечныя панэлі — з 25% да 50%;
• паўправаднікі — з 25% да 50%;
• электрамабілі — з 25% да 100%;
• літыевыя батарэі і крытычна важныя мінералы — у 7,5% да 25%;
• асобныя тавары са сталі і алюмінію — з 7,5% да 25%.

Кошт імпартаваных тавараў, якія будуць закранутыя новымі тарыфамі, ацэньваецца ў $18 млрд. Амерыканскі прэзідэнт Джо Байдэн заявіў, што не дазволіць Кітаю «несумленна кантраляваць рынак» згаданых тавараў.

Такі крок зроблены ў адказ на несправядлівыя гандлёвыя практыкі Кітая і мае пайсці на карысць працоўных месцаў у ЗША. У азіяцкай краіне ўжо паабяцалі прыняць люстраныя меры.

Зрэшты, аналітыкі лічаць навіны галоўным чынам сімвалічнымі, а мэтай уладаў называюць жаданне заручыцца магутнейшай падтрымкай электарату на будучых выбарах.