«Steam памёр»: сэрвіс перавёў Турцыю, Аргенціну і яшчэ 25 краін на долары — і выклікаў лютасць геймераў

Кампанія-ўладальнік платформы Valve увяла два новыя рэгіёны:

• LATAM-USD: Аргенціна, Беліз, Балівія, Венесуэла, Гаяна, Гватэмала, Гандурас, Нікарагуа, Панама, Парагвай, Сальвадор, Сурынам і Эквадор;
• MENA-USD: Турцыя, Алжыр, Бахрэйн, Егіпет, Іарданія, Ірак, Емен, Ліван, Лівія, Марока, Аман, Палесціна, Судан і Туніс.

Кампанія рэкамендавала распрацоўшчыкам выстаўляць у гэтых рэгіёнах ніжэйшыя кошты ў параўнанні з ЗША, але выдаўцы да парады не прыслухаліся. Кошт некаторых гульняў літаральна ўзляцеў у некалькі разоў. Напрыклад, EA Sports FC 24 стала $70 замест $30-40 у мясцовых валютах; S. T. A. L. K. E. R. 2: Heart of Chornobyl стаў $60 замест $8-12.

Карыстальнікі ў Reddit скардзяцца, што платформа не ўлічыла эканамічнай сітуацыі ў краінах і не канвертавала цэны для мясцовых жыхароў. Прза валацільнасць валютных курсаў цэны на некаторыя гульні ўзляцелі ў дзясяткі разоў. Некаторыя заявілі, што цяпер Steam стаў для іх фінансава недаступны.

«Учора я выдаткаваў 46 тысяч аргенцінскіх песа (каля $110) на некаторыя гульні, цяпер з новымі цэнамі гэта будзе каштаваць мне 701 тысячу (каля $1700)», — расказаў адзін геймер з Аргенціны. «Цэны моцна выраслі. У тры разы ці нават больш. Цяпер гульні сталі занадта дарагімі. $70 за гульню — гэта шмат для туркаў. Больш як палова сем’яў зарабляе менш за $400 на месяц», — піша турэцкі карыстальнік.

Самае распаўсюджанае тлумачэнне сярод геймераў — такім чынам Steam спрабуе змагацца з карыстальнікамі з іншых краін (у тым ліку з Беларусі і Расіі, дзе доступ абмежаваны), якія рэгіструюць турэцкія і аргенцінскія акаўнты, каб эканоміць на гульнях. Многія нязгодныя з цэнавай палітыкай Steam заявілі, што стануць карыстацца пірацкімі версіямі гульняў або пяройдуць у Epic Games Store.