TikTok ужо колькі гадоў спрабуе пераканаць улады ЗША пакінуць яе ва ўласнасці ByteDance

Паводле даных Reuters, сацсетка апошнія тры гады спрабуе пераканаць дзяржаўныя ведамствы і агенцтвы ЗША ў тым, што асабістыя даныя амерыканскіх карыстальнікаў платформы знаходзяцца ў бяспецы, а кантэнт, які размяшчаецца ў сацсетцы, не кантралюецца ўрадам Кітая.

Раней прэзідэнт ЗША Джозэф Байдэн скасаваў указ свайго папярэдніка Дональда Трампа пра забарону TikTok на тэрыторыі краіны. Аднак перамовы паміж адміністрацыяй прэзідэнта і кампаніяй працягваліся, стораны планавалі ўкласці нейкую ўгоду, якая дазволіла б вырашыць праблемы бяспекі.

Для гэтага TikTok заключыла пагадненне з Oracle пра захоўванне карыстальніцкай інфармацыі, а таксама арганізавала падраздзяленне United States Data Securities (USDS) для кантролю ўзроўню абароны даных і мадэрацыі кантэнту. Крыніцы сцвярджаюць, што кампанія выдаткавала $1,5 мільярда для наймання супрацоўнікаў і на рэарганізацыйныя выдаткі для стварэння гэтага падраздзялення.

Аднак многія амерыканскія ведамствы дагэтуль выступаюць супраць, бо, на іх думку, амерыканскія карыстальнікі застануцца ўразлівымі, паколькі праграма выкарыстоўвае тэхналогіі ByteDance, якія таксама прымяняюцца ў кітайскім аналагу TikTok пад назвай Douyin.

Сацсетка пашырыла ролю Oracle, каб аддзяліць сваю тэхналагічную інфраструктуру ад ByteDance. Супрацоўнікі Oracle будуць правяраць код праграм, які забяспечвае працу розных функцый, для гэтага плануецца арганізаваць так званыя «цэнтры празрыстасці». Акрамя таго, сацсетка прапанавала арганізаваць раду «давераных асоб» для кіравання USDS.