Трамп замарозіў фінансаванне праграм навучання па абмене. Ужо закранула беларусаў
У лютым адміністрацыя Дональда Трампа прыпыніла фінансаванне шэрагу адукацыйных і культурных праграм — як для амерыканцаў, так і для замежнікаў. Праблемы ўжо ўзніклі і ў беларускіх студэнтаў у ЗША. З адной са студэнтак паразмаўляла найстарэйшае выданне Беларусі.
Дзярждэп ЗША замарозіў фінансаванне чатырох вядомых амерыканскіх праграм абмену — Фулбрайт, стыпендыі Гілмана, стыпендыі Critical Language і IDEAS. Меркавалася, што паўза ў фінансаванні працягнецца 15 дзён, але сітуацыя дагэтуль застаецца няпэўнай. У пачатку сакавіка паведамлялася, што некаторыя замежныя студэнты атрымліваюць выплаты з затрымкай, а іншыя атрымліваюць на рукі значна менш, чым павінны былі.
Суразмоўніца выдання — беларуская стыпендыятка праграмы Фулбрайт. Ёй і іншым студэнтам затрымалі выплаты за сакавік. За красавік яны атрымалі стыпендыі авансам, але што будзе далей — невядома: каардынатары праграмы папярэдзілі, што фінансаванне замарожана.
«Я моцна перажываю праз гэта. Разлічваць асабліва няма на што. Хіба што на тое, што сітуацыя хутка вырашыцца — ведаю, што некаторыя навуковыя гранты ўжо размарозілі. Можна падацца на экстраннае фінансаванне ад уінвера, ёсць яшчэ экстранны крэдыт, але гэта апошняе, на што хочацца ісці», — турбуецца дзяўчына.
З-за скарачэння сярод адміністратараў праекта студэнтам складана атрымаць дазвол на працу, каб хоць часткова пакрыць свае патрэбы. Беларусцы па яе візе тэарэтычна могуць дазволіць працаваць толькі 20 гадзін на тыдзень і толькі па спецыяльнасці або на кампусе ўніверсітэта.
«Ім сапраўды давялося скараціць людзей — пра гэта нам таксама некалькі тыдняў таму даслалі ліст. І цяпер у арганізацый, якія кіруюць грантамі, няма магчымасці апрацоўваць дакументы. Гэта значыць, што атрымаць дазвол на працу ад Фулбрайта зараз амаль немагчыма — яны так і напісалі на сваім партале для стыпендыятаў», — кажа дзяўчына. Іншыя стыпендыяты апынуліся ў падобнай сітуацыі, але кожны — са сваімі нюансамі ў залежнасці ад спецыфікі навучальнай праграмы або ўніверсітэта.
Амерыканскія выданні ў канцы сакавіка пісалі, што фінансаванне праграм, затрыманае амаль на два месяцы, паступова аднаўляецца — але не для ўсіх і ў выпадковых аб’ёмах. Ад уладаў ніякіх тлумачэнняў з гэтай нагоды так і не паступала.
Тым часам Трамп распачаў працэс ліквідацыі Міністэрства адукацыі ЗША — гэта было адным з яго перадвыбарчых абяцанняў. 20 сакавіка ён падпісаў адпаведны ўказ. «Яно не прыносіць нам ніякай карысці», — сцвярджае прэзідэнт, бізнесмен і мільярдэр.
Читать на dev.by