Алеся Чапкевич world 3 сакавіка 2026, 15:45

Тры дата-цэнтры Amazon пацярпелі ад удараў дронаў. З аднаго эвакуявалі супрацоўнікаў

Amazon паведаміла аб пашкоджанні трох дата-цэнтраў на Блізкім Усходзе ў выніку ўдараў беспілотнікаў на фоне канфлікту паміж ЗША і Іранам у рэгіёне.

2 каментарыя

Тры дата-цэнтры Amazon пацярпелі ад удараў дронаў. З аднаго эвакуявалі супрацоўнікаў

Amazon паведаміла аб пашкоджанні трох дата-цэнтраў на Блізкім Усходзе ў выніку ўдараў беспілотнікаў на фоне канфлікту паміж ЗША і Іранам у рэгіёне.

Прамыя траплянні былі па двух аб’ектах у ААЭ. Трэці цэнтр у Бахрэйне быў пашкоджаны ад удару дрона «у непасрэднай блізкасці», гаворыцца ў учарашнім апдэйце на статуснай панэлі AWS.

«Гэтыя ўдары прывялі да структурных пашкоджанняў, парушэння падачы электраэнергіі да нашай інфраструктуры і ў некаторых выпадках запатрабавалі прымянення сістэм пажаратушэння, што выклікала дадатковую шкоду ад вады. Мы цесна супрацоўнічаем з мясцовымі ўладамі і надаем першачарговую ўвагу бяспецы нашага персаналу ў ходзе аднаўленчых работ», — дадала кампанія.

Праблемы з інфраструктурай закранулі шэраг сэрвісаў AWS, уключаючы вылічальны сэрвіс EC2, воблачнае сховішча S3 і базу дадзеных DynamoDB. У кампаніі дадалі, што паколькі канфлікт працягваецца, агульная абстаноўка ў рэгіёне непрадказальная.

Amazon сказала, што з улікам характару пашкоджанняў аднаўленне зойме «працяглы час», і параіла кліентам, чые рабочыя нагрузкі размешчаны на Блізкім Усходзе, падумаць аб рэзервовых копіях дадзеных ці нават перанесціся ў іншыя рэгіёны AWS.

Мабільныя аператары далі бясплатны інтэрнэт і званкі ў роўмінгу беларусам на Блізкім Усходзе

У апошнім абнаўленні ў панядзелак увечары Amazon сказала, што дасягнула «прагрэсу» у аднаўленні кіруючых плоскасцей DynamoDB і S3 — базавых сэрвісаў платформы. Па яе ацэнках, на поўнае аднаўленне электразабеспячэння і падключэння яшчэ павінен быў спатрэбіцца «мінімум дзень».

Акрамя гэтага, рытэйлерскі бізнес Amazon зачыніў склады і прыпыніў дастаўку ў Абу-Дабі з-за абвастрэння ў рэгіёне.

Business Insider таксама азнаёміўся з унутраным дакументам Amazon з падрабязнасцямі аб наступствах для воблака. Кампанія эвакуявала супрацоўнікаў і зачыніла доступ мінімум да аднаго з ЦАД з-за «сур’ёзных структурных пашкоджанняў» і затапленняў у выніку атак.

Пашкоджанні вывелі з ладу 14 стоек воблачных сервераў EC2 і яшчэ 5 «вытворчых» стоек, у якіх размяшчаюцца серверы і іншае абсталяванне для воблачных вылічэнняў. EC2 — ключавы вылічальны сэрвіс AWS.

Таксама былі парушаны сістэмы ахаладжэння. Паветраапрацоўчыя ўстаноўкі, якія рэгулююць тэмпературу, адключыліся з-за перабояў з электрычнасцю, а частка абсталявання выйшла з ладу па механічных прычынах. За станам аб’екта сачылі 30 камер, гаворыцца ў дакуменце.

Гэты дата-цэнтр пазначаны як DXB62 — верагодна, гаворка ідзе пра аб’ект AWS у Дубаі. Другі дата-цэнтр AWS пад назвай DXB61 быў спынены ў нядзелю пасля «ўскоснага ўздзеяння». Невялікі пажар быў патушаны, а доступ на аб’ект забаронены без дазволу ўрада. На трэцім аб’екце, DXB60, адключыўся Wi-Fi, але наступствы, па дакуменце, насілі лакальны характар.

На гэтым фоне Amazon аб’явіла аб дадатковых інвестыцыях у $21 млрд у ЦАД і ШІ-інфраструктуру ў Іспаніі.