Цукерберг апантаны штучным інтэлектам — аналітыкі жартуюць, што Meta неўзабаве зноў пераймянуюць

Раней у красавіку тэхдырэктар Meta Эндру Босварт казаў, што цяпер Цукерберг і топ-менеджмент Meta выдаткоўваюць большую частку свайго часу на штучны інтэлект. Гэтая заява ўсхвалявала некаторых аналітыкаў.

Праз некалькі дзён спецыялісты інвесткампаніі Bernstein апублікавалі папярэджанне інвестарам. «Сачыце за новым захапленнем Цукерберга да ўсяго, што звязана з АІ. Верагодна, год эфектыўнасці пратрымаўся толькі да красавіка і цяпер падыходзіць да скону, а кампанію можа чакаць змена назвы на MetAI (робім стаўку на яе)», — гаварылася ў электронным паведамленні.

Як адзначае Insider, інвестары і аналітыкі толькі адышлі ад трат кампаніі на метавёрс і цяпер хочуць толькі таго, каб яна трымала іх пад строгім кантролем. Звальненне чвэрці штату было менавіта тым, чаго яны хацелі. Аднак гнанне за OpenAI, Microsoft і Google у сферы штучнага інтэлекту абыдзецца Meta вельмі нятанна.

У кастрычніку фіндырэктар Meta заявіў, што практычна ўвесь рост капітальных выдаткаў кампаніі ў 2023 годзе будзе абумоўлены АІ. Цяпер Meta выдаткоўвае мільярды долараў на чыпы Nvidia для трэніроўкі генератыўных мадэляў — адзін такі можа каштаваць каля $10 тысяч.

Аперацыйны дырэктар Meta таксама адзначаў, што машыннае навучанне, алгарытмы і АІ неабходныя кампаніі для таго, каб павысіць эфектыўнасць яе ключавога, рэкламнага бізнэсу дзякуючы павышэнню рэлевантнасці аб’яў.