У 2024 годзе ў выніку інтэрнэт-злачынстваў беларусы страцілі больш за 63 млн рублёў (па сённяшнім курсе гэта больш за $20 млн), вярнуць якія «дастаткова складана». Пра гэта паведаміў начальнік Галоўнага ўпраўлення працэсуальнага кантролю Следчага камітэта Вадзім Кісель выданню «СБ. Беларусь сегодня». Па яго словах, ахвярамі кіберзлачынстваў становяцца не толькі людзі старэйшага ўзросту, але і моладзь.
У 2024 годзе ў выніку інтэрнэт-злачынстваў беларусы страцілі больш за 63 млн рублёў (па сённяшнім курсе гэта больш за $20 млн), вярнуць якія «дастаткова складана». Пра гэта паведаміў начальнік Галоўнага ўпраўлення працэсуальнага кантролю Следчага камітэта Вадзім Кісель выданню «СБ. Беларусь сегодня». Па яго словах, ахвярамі кіберзлачынстваў становяцца не толькі людзі старэйшага ўзросту, але і моладзь.
З 2019 года колькасць зарэгістраваных у Беларусі кіберзлачынстваў вырасла прыкладна ўдвая. Калі пяць гадоў таму іх было каля 10,5 тысячы, то ў 2024 годзе колькасць «ужо перавышае дваццацітысячную адзнаку».
Істотна змянілася структура кіберзлачыннасці: калі раней зламыснікі часцей звярталіся да фішынгу або вішынгу (галасавога фішынгу), а сярод злачынстваў пераважалі крадзяжы, якія здзяйсняюцца шляхам мадыфікацыі камп’ютарнай інфармацыі, то зараз пераважаюць розныя варыяцыі інтэрнэт-махлярства. Напрыклад, у 2023 годзе праваахоўнікі зафіксавалі каля 4 тысяч злачынстваў праз махлярскае завалоданне маёмасцю праз інтэрнэт, а ў 2024 годзе колькасць такіх злачынстваў узрасла да 11 тысяч. Па-ранейшаму шмат крадзяжоў здзяйсняецца праз мадыфікацыю камп’ютарнай інфармацыі.
Асноўныя спосабы падману, якія выкарыстоўваюць зламыснікі: патрабаванне перадаплаты за тавары, якія нібыта прадаюцца па вельмі нізкім кошце, дапамога сваякам, якія нібыта трапілі ў бяду, інвеставанне ў бізнес, дэклараванне даходаў, а таксама дапамога нібыта ў выкрыцці злачынцы, які таемна спрабуе атрымаць крэдыт на імя ахвяры. Махляры выкарыстоўваюць усё больш разнастайныя і вытанчаныя метады сацыяльнай інжынерыі, заснаваныя на пачуцці даверу.
Беларусаў заклікаюць быць пільнымі і не пераходзіць па падазроных спасылках, нават калі яны выглядаюць сапраўднымі і абяцаюць выгадныя ўмовы, а таксама не пакідаць сваю інфармацыю на сумнеўных інтэрнэт-рэсурсах.
Таксама махляры ўсё часцей эксплуатуюць страх беларусаў перад рэпрэсіямі ў краіне. Напрыклад, у мінулым годзе Telegram-каналы пісалі пра махлярскую схему ў Instagram, дзе за сімвалічныя €20 еўра людзям прапаноўвалі «забыць» нібыта знойдзеную ў іх акаўнтах «экстрэмісцкую» інфармацыю. Вядомыя выпадкі, калі беларусам пагражалі вобшукамі ў сацсетках і патрабавалі «задэклараваць» грошы, пасля чаго людзі гублялі свае зберажэнні.
Рэлацыраваліся? Цяпер вы можаце каментаваць без верыфікацыі акаўнта.