Godel звольніць частку каманды ў Польшчы. Адзін з крытэраў — узровень англійскай

Што кажуць супрацоўнікі

Звальненні, хутчэй за ўсё, у асноўным закрануць спецыялістаў, якія працуюць у Польшчы, што стала асноўнай лакацыяй для кампаніі.

За апошнія два гады Godel адкрыла тут 4 офісы (у Лодзі, Гданьску, Беластоку, Уроцлаве). Таксама ў Польшчы, а не ў Беларусі працуе асноўная каманда — каля 1400 супрацоўнікаў (з 2000 ва ўсіх лакацыях). Многія рэлакаваліся з РБ. «У Беларусі засталіся тыя, хто даўно працуе ў кампаніі і не плануе пераезду».

У кампаніі не будзе рэзкіх скарачэнняў. Спецыялістам, якія працуюць у штаце па кантракце, далі магчымасць дапрацаваць да канца месяца. Тым, хто аформлены як ІП, далі на пошук працы два месяцы.

Пазней некаторым ІП прапанавалі альтэрнатыўны варыянт: звальненне праз месяц або сыход на неаплачваны бестэрміновы бэнч да з’яўлення праекта. Што праўда, кампанія не гарантавала з’яўлення праектаў і, адпаведна, аднаўлення выплаты заробку ў найбліжэйшыя паўгода.

Суразмоўцы dev.by не ведаюць, ці будуць кампенсацыі пры звальненні. Між тым некалькі супрацоўнікаў сцвярджаюць, што ім прыйдзецца «вярнуць» рэлакейт-бонус — каля 2-3 тысяч долараў. 

— Я рэлакаваўся і ўладкаваўся як ІП. B2B выгаднейшае па заробку і падатках у параўнанні з працай у штаце на employee contract. Паводле ўмоў дамовы я мушу адпрацаваць у кампаніі 2 гады. Калі менш, то маю вярнуць рэлакацыйны бонус. У маім выпадку гэта больш за 2 тысячы долараў. Як я разумею, у мяне яго ўтрымаюць з апошняга заробку, — расказаў супрацоўнік. 

Іншы суразмоўца гэтай інфармацыі не пацвярджае. «Ва ўсіх розныя кантракты і ўмовы па кампенсацыі бонусаў. Але ў выпадку звальнення не з ініцыятывы супрацоўніка бонус, здаецца, вяртаць не прыйдзецца».

Прычыны звальненняў у Godel

Адзін з суразмоўцаў падзяліўся сваім меркаваннем пра прычыны, якія вымусілі кампанію пайсці на скарачэнне каманды. 

— На пачатку мінулага года, наколькі я ведаю, у Godel хапала праектаў, але быў пэўны дэфіцыт спецыялістаў. Таму вясной-летам кампанія пачала актыўна хайрыць. У прыватнасці, набралі вялікую каманду JavaScript — больш за 200 чалавек. Але ўвосень нечакана пачаўся крызіс з праектамі. Нас кармілі абяцанкамі, што праекты будуць, але сітуацыя істотна не змянілася.

Суразмоўца сцвярджае, на бэнчы ўжо каля 120 чалавек. «Некаторыя сядзяць ад лета, некаторыя ад пачатку гэтага года, ані разу не папрацавалі на праектах, але працягваюць атрымліваць заробак». І бэнч, як чакаецца, будзе расці. У некаторых супрацоўнікаў неўзабаве скончацца дзейныя праекты, а новых у найбліжэйшыя некалькі месяцаў не прадбачыцца. Таму чакана, што кампанія вырашыла скараціць частку каманды.

Не толькі бэнч

Паводле слоў суразмоўцаў, у Godel знайшлі дадатковую нагоду для звальнення. Асобным супрацоўнікам зладзілі нечаканую праверку ведаў англійскай мовы.

— Тэст на камп’ютары. Шмат пытанняў, але не так шмат часу на падрыхтоўку. У каго ніжэйшы за В2, таго скарачаюць, нягледзячы на добрыя скілв.

Зрэшты, паводле слоў суразмоўцаў, нават паспяховае праходжанне тэста не гарантуе захавання месца ў кампаніі. Акрамя таго, кампанія не ўсім прапанавала прайсці тэст, а ўлічвала пры прыняцці рашэння раней пацверджаны ўзровень англійскай.

— Мой узровень англійскай праверылі яшчэ ўзімку. І я паставіў мэту яго палепшыць, пайшоў на курсы. Але гэта не дапамагло.  Мне сказалі, што ў мяне недастатковы ўзровень для прызначэння на праект і што праекты для майго ўзроўню англійскай да канца года не чакаюцца. Таму прынятая пастанова мяне скараціць, — расказаў адзін з супрацоўнікаў Godel.

Мы звярнуліся з пытаннямі ў кампанію. Апублікуем адказ, калі атрымаем. 

Дзякуй, што прачыталі гэты матэрыял. Вы можаце падтрымаць працу рэдакцыі dev.by рознымі спосабамі, напрыклад, хуткім данатам проста цяпер.