Белстат больш не паказвае адтоку айцішнікаў. Палічылі зімовыя «страты»

Мяркуючы з афіцыйных даных, кампаніі ІКТ пакуль скарачаюць штаты інтэнсіўней, ніж на пачатку мінулага года. За люты ў ІКТ-сектары было звольнена больш за 1,7 тысячы спецыялістаў. Гэта на 18% больш, ніж у лютым мінулага года. Адносна студзеня гэтага года лічба звольненых вырасла нязначна — усяго на 2,7%. 

Сумарна за студзень–люты кампаніі ІКТ звольнілі 3,4+ тысячы супрацоўнікаў — на 15,5% больш, ніж за аналагічны перыяд мінулага года.

Летась у агульнай статыстыцы звальненняў у сектары «інфармацыя і сувязь» доля ІТ-кампаній складала прыкладна 85-90%. Такім чынам, беспасярэдне ў ІТ-сектары за два месяцы маглі звольніць каля 2,9-3+ тысячы спецыялістаў. Гэта на 20% больш, ніж за такі ж перыяд мінулага года. 

Найманне ў ІКТ у лютым крыху вырасла адносна студзеня гэтага года (+6), але ўпала на 50% у параўнанні з лютым мінулага года. Усяго кампаніі працаўладкавалі за месяц амаль 900 супрацоўнікаў. За студзень–люты працу атрымалі 1,7+ тысячы чалавек, або на 50% менш, ніж за аналагічны перыяд мінулага года. 

Летась у агульнай статыстыцы наймання ў сектары «інфармацыя і сувязь» доля ІТ-кампаній складала 80-90%. Такім чынам, у студзені–лютым гэтага года беспасярэдне ІТ-кампаніі маглі працаўладкаваць, паводле нашых ацэнак, 1380-1540 спецыялістаў.

У цэлым за два месяцы кампаніі ІКТ звольнілі ў два разы больш спецыялістаў, ніж узялі на працу.

Адток спецыялістаў у ІТ-сектары, паводле нашых ацэнак, перавысіў за студзень-люты 1500 чалавек (у сярэднім 750+ чалавек на месяц). Для параўнання за такі ж перыяд мінулага года ў ІТ быў прыток: колькасць супрацоўнікаў у кампаніях вырасла на 600+ чалавек.