Алеся Чапкевич bel 3 верасня 2025, 17:14

У Беларусі з'явілася лабараторыя лічбавых двайнікоў (але гэта не тое, пра што вы падумалі)

У Полацкім дзяржаўным універсітэце адкрылася лабараторыя «Лічбавы двайнік», паведамляе Міністэрства адукацыі. Гэта першая ў краіне навучальная прастора, цалкам пабудаваная на айчынных лічбавых тэхналогіях, аналагічных тым, што прымяняюцца на рэальных аб’ектах газавай галіны.

Пакінуць каментарый

У Полацкім дзяржаўным універсітэце адкрылася лабараторыя «Лічбавы двайнік», паведамляе Міністэрства адукацыі. Гэта першая ў краіне навучальная прастора, цалкам пабудаваная на айчынных лічбавых тэхналогіях, аналагічных тым, што прымяняюцца на рэальных аб’ектах газавай галіны.

Лабараторыя знаходзіцца ў Наваполацку. Яна створана ў рамках Канцэпцыі развіцця інжынернай адукацыі да 2035 года і паказвае прыклад узаемадзеяння паміж ВНУ і прамысловасцю.

Гэта шматфункцыянальны лічбавы комплекс з пяццю ключавымі зонамі:

лічбавы двайнік газаразмеркавальнай сістэмы Беларусі — дакладная віртуальная мадэль інфраструктуры, якая дазваляе мадэляваць працэсы ў рэальным часе;
мабільны лічбавы памочнік для падтрымкі навучальнага працэсу;
інтэрактыўная платформа «Прывітанне, Алёна» для дыялогу з лічбавым асістэнтам, пабудаваным на базе айчынных рашэнняў;
трэнажорна-сімуляцыйны клас для адпрацоўкі кіраўнічых рашэнняў у не/штатных сітуацыях;
3D-кластар для візуалізацыі і аналізу вялікіх аб’ёмаў дадзеных.

У лабараторыі выкарыстоўваецца айчынны праграмна-апаратны комплекс, які дае студэнтам-інжынерам доступ да актуальных тэхналагічных інструментаў і рэальных прамысловых дадзеных. Дзякуючы гэтаму яны вучацца на сцэнарыях, якія максімальна блізкія да працы на дзеючых прадпрыемствах. Студэнты асвойваюць навыкі аўтаматызацыі, лічбавізацыі і кіравання энергасістэмамі, якія важныя для тэхналагічнага суверэнітэту Беларусі, адзначае Мінадукацыі.