Алеся Чапкевич bel 16 сакавіка 2026, 13:37

У Беларусі за год мінус 20% інтэрнэт-крамаў. Іх зараз менш, чым у 2021

На дадзены момант у Гандлёвым рэестры зарэгістравана каля 24,9 тысячы інтэрнэт-крамаў. Такую лічбу прыводзіць sb.by.

Па стане на 1 студзеня 2025 у краіне налічвалася 30,99 тысячы такіх крамаў. Гэта значыць за год іх стала на 19,7% менш. Да пачатку 2021 года было 25,4 тысячы, і паказчык толькі рос.

У МАРГ кажуць, што актыўнае развіццё лічбавага гандлю, шырокі асартымент тавараў у інтэрнэце, прастата пошуку і зручнасць выкарыстання прыцягваюць не толькі спажыўцоў, але і недобрасумленных прадаўцоў.

Прадстаўнікі ведамства адзначылі, што анлайн-пакупкі ў топе сярод скаргаў спажыўцоў, разам з ЖКП. Але падкрэслілі, што менавіта ў гэтых сферах больш за ўсё карыстальнікаў і спажыўцоў.

Сярод самых частых заўваг да інтэрнэт-гандлю — рытэйлеры паказваюць недакладную візуальную інфармацыю аб тавары, сыходзяць ад адказу, калі тавар з недахопам, адмаўляюць у гарантыйным рамонце, не выконваюць тэрміны вяртання грошай, правядзення праверак і экспертыз, навязваюць дадатковыя тавары, усталёўваюць мінімальную суму пакупкі і не выходзяць на сувязь, калі ў спажыўца ўзнікаюць пытанні або праблемы з таварамі.

Колькасць пытанняў да інтэрнэт-крамаў з боку рэгулятара скарачаецца, а да маркетплэйсаў — расце. Таму ў МАРГ распрацоўваюць механізм рэгулявання анлайн-пляцовак.