У Мінску закрывае офіс яшчэ адзін топавы распрацоўшчык гульняў

Чуткі пра магчымае закрыццё мінскага офіса Playgendary з’явіліся яшчэ летам мінулага года. Тады па кампаніі прайшла хваля звальненняў. Прычым без працы засталіся не толькі супрацоўнікі мінскага офіса, але і іншых лакацый.

Паводле слоў былых супрацоўнікаў кампаніі, яшчэ ў маі ім паведамілі, што могуць узнікнуць праблемы з пераказам грошай з-за мяжы на заробкі. Каб гэтага пазбегнуць, трэба было звольніцца са штату ў Мінску і падпісаць дыстанцыйна дамову з кіпрскім офісам. У выніку частку супрацоўнікаў, якія падпісалі такую дамову, нібыта на працягу кароткага перыяду часу звольнілі (называлася лічба — ад 150 да 200 чалавек).

У кампаніі не адмаўлялі, што былі звальненні, але заявілі, што адначасова альбо ў кароткі прамежак адразу 200 чалавек не звальнялі. На пытанне пра кіпрскую ракіроўку прадстаўнік Playgendary тады коратка адказаў: «Няма сэнсу пераводзіць на Кіпр, а потым звальняць».

Днямі ў Playgendary зноў прайшлі звальненні, паведаміў dev.by адзін з чытачоў. Ён сцвярджае, што такое рашэнне кампаніі было нечаканым для супрацоўнікаў. Іншыя падрабязнасці расказаць адмовіўся.

Мы адправілі запыт кампаніі. Апублікуем адказ, калі атрымаем. 

У Беларусі ў кастрычніку 2021 года ў Playgendary працавала каля 120 чалавек. Улетку 2022 года, як сцвярджалі былыя супрацоўнікі, штат скараціўся да 40 чалавек.

У лінкедзіне мы знайшлі профілі 300 чалавек, якія пазначылі Playgendary ў якасці актуальнага працадаўцы. Некалькі дзясяткаў спецыялістаў пазначылі ў якасці асноўнай лакацыі Беларусь. Ад восені 2022 кампанія стала прапаноўваць опцыю рэлакейту, у першую чаргу ў Расію, таксама ў Польшчу, Узбекістан, Грузію, Турцыю, Арменію.

На момант публікацыі на сайце Playgendary было 12 адкрытых вакансій.