Выйшла справаздача пра стартапы і інвестыцыі ў Еўропе. У Беларусі ўсё сумна

Беларусь дзякуючы Flo, які ў ліпені прыцягнуў €182 млн, увайшла ў топ-3 краін, чые стартапы паднялі больш за ўсіх на позніх стадыях. Раўнд Flo (разам з украінскім сэрвісам Creatio) стаў найбуйнейшым у рэгіёне ў мінулым годзе.

Таксама ў 2024-м Flo стаў «аднарогам». Акрамя яго, у клубе кампаній, ацэненых у $1 млрд і больш, адзначаны Pandadoc, а таксама EPAM і Wargaming. Сумарна яны атрымалі ў 2024 годзе $375 млн. У спісе стартапаў, якія могуць у бліжэйшы час атрымаць такі статус, прадстаўнікоў Беларусі няма.

Прадказальна, Беларусі няма і сярод краін, якія дэманструюць найвышэйшыя тэмпы росту стартап-экасістэмы з 2020 года. Лідзіруюць у гэтым спісе Літва, Сербія і Латвія.

У справаздачы прыведзены схемы з «аднарогамі» рэгіёна, чые былыя супрацоўнікі заснавалі ўласныя стартапы. Так, выхадцы з EPAM ёсць сярод заснавальнікаў Pandadoc, Banuba, фармацэўтычнага сэрвісу Liki24 (Украіна) і распрацоўшчыка казуальных гульняў Originalgames (Эстонія).

У EPAM і Wargaming больш за палову штату базуецца ўнутры разгледжанага рэгіёна. У Flo — крыху менш за палову, каля чвэрці — у Pandadoc. Цікава, што ўсе краіны  пры згадванні на інфаграфіках суправаджаюцца значком іх сцяга — акрамя Беларусі: яна ўсюды пазначаная без сцяга.

У цэлым у 2024 годзе кампаніі рэгіёна прыцягнулі €2,3 млрд венчурных інвестыцый, што на €200 млн больш, чым у 2023 годзе (+9%). З гэтай сумы €764 млн прыйшлося на раннія стадыі (перад/пасеўныя, Series A), €703 млн — на стадыі Series B/C, і €818 млн — на познія стадыі. Даследчыкі зафіксавалі 76 экзітаў — на 20 больш, чым у 2023 годзе.

Найбольш прыбытковыя галіны рэгіёна — карпаратыўнае ПЗ, ШІ і фінтэх. Нягледзячы на поспехі, ён сутыкаецца з праблемамі маштабавання: каля паловы кампаній пераехалі — пераважна ў ЗША — для доступу да глабальных рынкаў. Аўтары даклада лічаць, што недахоп позніх інвестыцый і няроўнае развіццё, асабліва ў сферы deeptech, могуць запаволіць далейшы рост мясцовай стартап-экасістэмы.