Youtube забараніў выкарыстоўваць чужыя праграмы з блакіроўшчыкамі рэкламы
Відэахостынг унёс змены ў палітыку ў рамках шматгадовай барацьбы з блакіроўшчыкамі рэкламы на розных прыладах. Цяпер прыйшла чарга праграм у мабільных гаджатах.
У заяве Youtube сказана, што палітыка сэрвісу не дазваляе «чужым праграмам блакаваць рэкламу, бо праз гэта аўтары кантэнту не могуць атрымліваць узнагароду за прагляды». Новае змяненне ў палітыцы ў першую чаргу накіраванае супраць блакіроўшчыкаў рэкламы на мабільных прыладах.
«Мы дазваляем чужым праграмам выкарыстоўваць наш API толькі ў тым выпадку, калі яны адпавядаюць умовам выкарыстання службаў API. Калі мы выявім праграму, якая парушае гэтыя ўмовы, мы зробім адпаведныя захады для абароны нашай платформы, аўтараў і карыстальнікаў», — дадалі ў кампаніі.
Youtube ужо некалькі гадоў змагаецца з блакіроўшчыкамі рэкламы. Летась платформа пачала блакаваць відэа для карыстальнікаў, якія пры ўзаемадзеянні з сэрвісам выкарыстоўваюць браўзерныя пашырэнні для блакавання рэкламы. Так платформа спрабуе заахвоціць карыстальнікаў перайсці на платную падпіску YouTube Premium.
Читать на dev.by