«Зялёныя кніжкі СССР не бяруць». У якіх гарадах Польшчы яшчэ можна вырашыць новую праблему з дакументамі

«Умейсцавенне» — гэта (пакуль) апошні шанец вырашыць новую праблему беларусаў у Польшчы без паездкі ў РБ.

Здаецца, найбольш адмоў атрымліваюць людзі з «зялёнымі кніжкамі» — пасведчаннямі аб нараджэнні БССР/СССР. Больш свежыя дублікаты такіх пасведчанняў (без апасціля) згаджаюцца прыняць часцей.

Інфармацыя аб практыцы на месцах супярэчлівая. Таму людзі пачалі самастойна весці табліцу, як падыходзяць да працэдуры ў асобных ужондах розных ваяводстваў.

Вось што расказалі чытачы.

• У Варшаве 8 жніўня ў USC (польскі ЗАГС) на Chałubińskiego 8 у мяне і ў мужа не прынялі паўторныя САН (дублікаты савецкіх, зробленыя ўжо ў РБ, — прым.) без апасціля. Сказалі, што ўнутранае распараджэнне па ўсім Мазавецкім ваяводстве. На пытанне, ці ведаюць яны пра тое, што вялікая частка не зможа апасціль зрабіць, бо не можа прыехаць у РБ, пані сумна паглядзела, сказала, што ўсё разумее, але нічога зрабіць не можа. 11 жніўня рана раніцай я падалася ў Гданьску, і ў мяне ўсё прынялі без апасціля. Але праз 20 хвілін ператэлефанавалі з ужонда і сказалі — так, мае дакументы ўжо прынялі, але каб я папярэдзіла знаёмых, што больш прымаць не будуць.
• Па ўмейсцаванню пасведчанняў: пацвярджаю. Абтэлефаноўваў тыдзень таму ўжонды па напрамку на Жырардаў — усе патрабавалі апасціль. Ужонды на ўсход — усё ок з прысяжным перакладам. Я браў да 100 км ад Варшавы.
• Быў з 8 раніцы ў USC Bialystok (ЗАГС у Беластоку). У 8 раніцы маё пасведчанне аб нараджэнні БССР прымалі, але для пасведчання аб шлюбе папрасілі прывезці даверанасць ад жонкі. Пакуль ездзіў, у 9.30 сказалі, паступіў званок: новае распараджэнне — БССР/СССР не бяром больш, рабіце паўторнае на бланку РБ. Апасціль у Беластоку на дадзены момант не патрабуюць! Мой СОБ і СОР дзяцей (арыгіналы РБ) узялі + пераклады адпаведна. Таксама тут патрэбна пасведчанне аб шлюбе бацькоў (робяць ксеракопію, пераклад забіраюць) ці даведка з ЗАГСа, што разведзены (таксама з перакладам). Спытаў, што калі жонка заўтра прыедзе сабе рабіць транскрыпцыю для польскага СОР — сказалі, зялёныя-карычневыя кніжкі БССР/СССР больш не бяруць! Толькі паўторнае (пакуль тут без апасціля). Таксама краем вуха пачуў размову начальніцы, што для тых хто пад МЗ, будзе выключэнне (старыя правілы). FYI — у РБ паўторныя СОР/СОБ робяць на працягу гадзіны-дзвюх, калі звернецеся ў той жа ЗАГС (якія першапачаткова выдаваў). Можна ў любы ЗАГС у іншым раёне-горадзе — тады 2 тыдні чакаць. Па цане, здаецца, 1 базавая была.
• Рабіла транскрыпцыю пасведчань аб нараджэнні і шлюбу ў ліпені ў Познані. Падавала арыгіналы і пераклады. Некаторыя пасведчані былі дублікатамі. Усе былі ўжо новага абразца, выдадзеныя РБ, а не СССР. Апастыляў не было і ніхто ні слова не сказаў пра іх. Калі пыталася пра працэдуру ў інфармацыі ўжонда, то папярэдзілі, што старое пасведчанне ад СССР не можна «ўмейсцоваць».
• Рабіў «умейсцавенне» пасведчання аб нараджэнні тры тыдні таму ў Гдыні. З РБ прывезлі дублікат новага ўзору. Зрабіў прысяжны пераклад, аплаціў паслугу ва ўжондзе і праз тыдзень ужо забраў выдрук польскага пасведчання аб нараджэнні.
• Падавалі на umiejscowienie 2 савецкія пасведчанні аб нараджэнні, расійскае пасведчанне аб шлюбе 2006 г., пасведчанне аб нараджэнні 2008 г. — у Кракаве 1 ліпеня 2025 г., без апасціля. Усё прынялі і ўжо атрымалі новыя дакументы.
• Падавалася ў Кракаве нядаўна на umiejscowienie, але пакуль не атрымала гатовы дакумент — у мяне было паўторнае пасведчанне аб нараджэнні і прысяжны пераклад рабіўся з рускай (хоць я спачатку прасіла яго з беларускай рабіць). У выніку з першай спробы не ўдалося падацца, бо калі пераклад зроблены з рускай часткі пасведчання, то неабходна дадаткова асобна перакладаць пячатку ў пасведчанні — тэкст, які змяшчаецца ў ёй, беларускі і ўсе адбіткі пячаткі на дакументах, адпаведна, таксама. З другой спробы падалася без праблем.

Беларусам цяпер складаней легалізавацца ў Польшчы — там перасталі прымаць дакументы БССР і патрабуюць апастыль

Па тэме

Беларусам цяпер складаней легалізавацца ў Польшчы — там перасталі прымаць дакументы БССР і патрабуюць апастыль

«Эміграцыя адабрала ўсё». Айцішнікі незадаволены новай якасцю жыцця — чатыры гісторыі

Па тэме

«Эміграцыя адабрала ўсё». Айцішнікі незадаволены новай якасцю жыцця — чатыры гісторыі