1,5 тысячы супрацоўнікаў Google запатрабавалі гарантаваць ім працу — баяцца новых звальненняў

Выданне лічыць петыцыю чарговай праявай нізкага маральнага духу ў Google, па якім ударыла чарада няўдалых рэлізаў і пратэстаў супрацоўнікаў праз неадназначныя кантракты летась, а таксама звальненні, якія цягнуцца ад 2023-га і, верагодна, працягнуцца.

Падпісанты працуюць у офісах Google у ЗША і Канадзе. «Мы занепакоеныя нестабільнасцю ў Google, якая перашкаджае нам рабіць якасную, значную працу. Бясконцыя раўнды звальненняў ствараюць у нас пачуццё няўпэўненасці за нашыя працоўныя месцы. Кампанія, відавочна, знаходзіцца ў трывалым фінансавым становішчы, праз што страта шматлікіх каштоўных калег без тлумачэнняў яшчэ больш балючая», — напісалі яны.

У мінулым кастрычніку новая фіндырэктарка Google Анат Ашкеназі адзначала, што адным з ейных прыярытэтаў будзе далейшае зніжэнне выдаткаў у Google па меры павелічэння выдаткаў кампаніі на АІ у 2025 годзе. Гуглеры спрабавалі дазнацца ў кіраўніцтва тлумачэння слоў Ашкеназі, але ніякай канкрэтыкі не дамагліся.

Падпісанты петыцыі просяць перад скарачэннямі дазволіць супрацоўнікам сысці самім, забяспечыць ім выходную дапамогу ўзроўню студзеня 2023 года і не выкарыстоўваць нізкіх ацэнак на перфоманс-рэв’ю як інструмент для скарачэнняў. У студзені 2023-га кампанія агулам звольніла 12 тысяч чалавек. Тады яна выплачвала аклад за 16 тыдняў плюс двухтыднёвы аклад за кожны год працы. Звальненні працягнуліся, яны закраналі розныя аддзелы. Выходныя дапамогі розніліся.