Amazon загадала супрацоўнікам вярнуцца ў офісы ад мая. Але офісы будуць гатовыя толькі ў верасні
Ад мая супрацоўнікі Amazon абавязаныя мінімум тры дні на тыдзень працаваць з офіса. Здаецца, кампанія моцна паспяшалася, паколькі многія з яе офісных будынкаў будуць гатовыя прыняць натоўп людзей на рэгулярнай аснове толькі праз некалькі месяцаў. Пра гэта піша Insider са спасылкай на ўнутраныя дакументы Amazon, у якіх пералічаныя офісы тэхнагіганта і даты, калі яны змогуць зноў расчыніць дзверы для ўсіх (не)ахвотных.
Напрыклад, пяць з шасці лакацый Amazon у Нью-Ёрку і чатыры з шасці ў Осціне будуць гатовыя 1 верасня. У офісаў у Куперціна і ўсходнім Апала-Альта таксама дэдлайн у верасні, у Атланце (Джорджыя) і Тэмпе (Арызона) — 1 ліпеня. Большасць астатніх пунктаў, напрыклад у Чыкага і Бостане, наогул пакуль не вызначыліся і мусяць назваць дату да канца тыдня. Некаторыя офісы ўсё ж укладуцца ў тэрмін — у маі будуць цалкам гатовыя амаль усе офісы ў Сіэтле і акрузе, а таксама каля другой штаб-кватэры Amazon у віргінскім Арлінгтане.
Пра новы распарадак, які мае павысіць эфектыўнасць працы, кампанія абвясціла ў лютым. Як адаб’ецца на супрацоўніках негатоўнасць офісаў, за якімі яны замацаваныя, невядома. Магчыма, мяркуе выданне, навіну будуць рэалізоўваць паступова па меры гатоўнасці памяшканняў.
Insider піша, што офісныя будынкі цяпер адкрытыя і любы супрацоўнік у любы час можа прыйсці і працаваць. Між тым у кожным будынку Amazon праводзіць праверку «сетак, доступу Wi-Fi, настольнага абсталявання, канферэнц-залаў і іншых» неабходных для працы ўмоў. Прадстаўнік кампаніі ў каментары Insider пацвердзіў, што большасць офісаў будзе гатовая ў верасні.
Читать на dev.by