Apple згарнула 10-гадовы праект па распрацоўцы электракара

Навіну ўдзельнікам каманды, якая налічвала 2 тысячы чалавек, паведамілі ў аўторак аперацыйны дырэктар Apple Джэф Уільямс і віцэ-прэзідэнт праекта Кевін Лінч. Многія супрацоўнікі будуць пераведзеныя на праекты, звязаныя з генератыўным АІ. Яшчэ частка будзе звольненая, але дакладныя лічбы невядомыя.

Раней у лютым Wired паведамляў, што ў 2023 годзе аўтамабілі з тэхналогіяй беспілотнага кіравання Apple праехалі больш за 72 тысячы км. Bloomberg у студзені пісаў, што распрацоўшчыкі пасунулі рэліз аўто на 2028 год. Паводле інфармацыі некаторых крыніц, электракар меўся каштаваць да $100 тысяч.

Чуткі пра сакрэтны праект з’явіліся ў 2015 годзе. Apple прыцягнула да яго былога дырэктара распрацоўкі аўтапілота Tesla і СЕО электрамабільнага стартапа Canoo. Аднак праект сутыкнуўся з праблемамі — напрыклад, у 2021 годзе яго пакінуў галоўны кіраўнік Даг Філд, які раней быў галоўным інжынерам у Tesla. У 2022-м праект не мог справіцца з цякучасцю кадраў, планамі, якія пастаянна змяняліся, і скептычным стаўленнем да яго саміх супрацоўнікаў. Пазней стала вядома, што электракар не будзе мець прасунутыя магчымасці беспілотнага кіравання, як планавалася першапачаткова. Цяпер Apple больш факусуе ўвагу і рэсурсы на генератыўных АІ.