Аддзел навін 13 студзеня 2023, 16:39

Колькасць аддаленых айцішных вакансій працягвае падаць

Паводле свежага даклада асацыяцыі CompTIA, колькасць вакансій у ЗША з магчымасцю працаваць аддалена працягвае зніжацца.

Апошнім часам эфектыўнасць супрацоўнікаў на аддаленай працы — асабліва новых — крытыкаваў гендырэктар Salesforce Марк Беніёф, супрацоўнікаў Disney таксама прымусілі вярнуцца з дому ў офіс мінімум на 4 дні на тыдзень. Праціўнікам гэтага фармату працы — таксама з прычыны прадукцыйнасці — з’яўляецца гендырэктар Tesla і Twitter Ілан Маск.

Даныя для справаздачы ў CompTIA бяруць у Федэральным бюро статыстыкі працы ЗША і кампаніі Lightcast, якая аналізуе мільёны вакансій на мясцовым рынку.

У снежні 2022 года колькасць аб’яў пра аддаленую працу па дзесяці найбольш запатрабаваных ІТ-прафесіях зменшылася больш чым на 10 тысяч. Варта адзначыць, што за месяц у цэлым знізілася колькасць айцішных вакансій у 5 топавых спецыяльнасцях.