Дураў расказаў следству, колькі зарабляе на год. Следчыя яму не паверылі

Паводле даных Le Monde, у часе допыту Дураў расказаў следчым, што зарабляе адзін дырхам на год, то-бок 27 цэнтаў у пераліку на долары. Заява аб заробку выклікала ў следчых здзіўленне, адзначаецца ў артыкуле. Дырхам — валюта ААЭ, дзе апошнія гады жыў бізнэсовец.

У часе абрання меры стрымання парыжская пракуратура прасіла ўстанавіць для Дурава заклад у памеры 20 мільёнаў еўра, але ў выніку сума была зніжаная да 5 мільёнаў еўра. Le Monde адзначае, што канчатковая сума закладу здаецца вельмі нізкай.

Журналісты высветлілі, што летась Дураў прапанаваў 8,5 мільёна еўра за эксклюзіўны аўтамабільны нумар на дабрачынным аўкцыёне ў Дубаі. Агульнае багацце Дурава ацэньваецца ў дыяпазоне ад $9 да $15,5 мільярда.

Павел Дураў быў затрыманы ў аэрапорце Парыжа 24 жніўня. Яго абвінавацілі ў злачынствах, звязаных з арганізаванай злачыннасцю, у тым ліку ў саўдзеле ў распаўсюдзе наркотыкаў і дзіцячай парнаграфіі, а таксама ў адмове даваць інфармацыю на запыт праваахоўных органаў.