ЕС прымусіў TikTok адмовіцца ад праграмы заахвочвання ў новай праграме

Запушчаная ў Францыі і Іспаніі праграма ўключае функцыю ўзнагароджання карыстальнікаў за розныя актыўнасці, у тым ліку прагляд відэа і рэкламы. У праграме ёсць «цэнтр узнагарод», у якім карыстальнікі атрымліваюць «манеты». Іх можна абмяняць на ваўчары Amazon і падарункавыя карты PayPal. Напрыклад, гадзіна прагляду відэа ўзнагароджваецца 0,36 еўра.

Еўрапейскі рэгулятар запатрабаваў ад кампаніі патлумачыць механізм дзеяння праграмы заахвочвання, а затым пачаў расследаванне, абвінаваціўшы сацсетку ў заахвочванні залежнасці ў карыстальнікаў. Еўракамісія лічыць, што механізм такога заахвочвання можа выклікаць «эфект прывыкання», асабліва ў непаўналетніх.

У адказ сацсетка заявіла, што функцыя недаступная для карыстальнікаў маладзейшых за 18 гадоў. Тым не менш Еўракамісія мяркуе, што механізмы TikTok недастаткова абараняюць карыстальнікаў і не прадухіляюць рэгістрацыі дзяцей. Праграма TikTok Lite пазіцыянуецца як «аблегчаная версія» асноўнай праграмы і прызначаная для выкарыстання пры павольным інтэрнэт-злучэнні.