Галоўны вучоны Google растлумачыў, чаму не любіць гаварыць пра агульны ШІ

«Я стараюся пазбягаць абмеркаванняў AGI, бо розныя людзі даюць яму вельмі розныя вызначэнні, і складанасць задачы адрозніваецца ў трыльёны разоў», — адзначыў ён у нядаўнім выпуску The Moonshot Podcast.

Па яго словах, цяперашнія ШІ-мадэлі, «магчыма, ужо» лепшыя за сярэднестатыстычнага чалавека ў большасці разумовых задач.

«Большасці людзей няпроста справіцца з выпадковымі заданнямі, з якімі яны ніколі не сутыкаліся. А вось некаторыя сучасныя мадэлі ў многіх выпадках паказваюць вельмі годны вынік», — сказаў навуковец. Але дадаў, што мадэлі ўсё яшчэ часта памыляюцца і «не дацягваюць да экспертнага ўзроўню ў некаторых абласцях». А быць сярэднячком у многім і быць лепшым за топавых сусветных спецыялістаў у кожнай задачы — гэта дзве зусім розныя рэчы, патлумачыў Дзін.

На пытанне аб тым, колькі яшчэ чакаць ШІ, які будзе рабіць навуковыя адкрыцці хутчэй за людзей, Дзін адказаў, што ў некаторых сферах гэты момант ужо не за гарамі. «У многіх абласцях аўтаматызаваны пошук і вылічэнні здольныя паскараць прагрэс — у навуцы, інжынерыі. Такія тэхналогіі адкрыюць новыя гарызонты для нашых магчымасцяў у бліжэйшыя 5, 10, 15, 20 гадоў», — адзначыў ён.

Што тычыцца дэфініцыі, то многія ШІ-даследчыкі разумеюць пад AGI інтэлект, падобны да чалавечага і здольны разумець і навучацца, як чалавек. Іншыя вызначаюць яго як аўтаномныя вылічальныя сістэмы, якія перавышаюць людзей у большасці эканамічна карысных задач. Часавыя рамкі дасягнення ШІ па версіі розных экспертаў адрозніваюцца ад некалькіх гадоў да дзесяцігоддзяў.