Google заявіла, што інтэрнэт у заняпадзе, хоць нядаўна адмаўляла гэта

У пададзеным на мінулым тыдні дакуменце юрысты Google заявілі: «Факт у тым, што сёння адкрыты вэб ужо знаходзіцца ў хуткім заняпадзе». Гэтая заява прагучала ў рамках антыманапольнай справы аб падзеле рэкламнага бізнесу кампаніі.

У красавіку суд прызнаў Google вінаватай у незаконнай манапалізацыі і пастанавіў, што яе практыкі нашкодзілі выдаўцам і канкурэнцыі. Міністэрства юстыцыі ЗША патрабуе сур’ёзных структурных мер, уключаючы падзел рэкламнага бізнесу, аднак Google рыхтуецца аспрэчваць рашэнне, сцвярджаючы, што такія крокі толькі паскораць падзенне даходаў выдаўцоў.

Паводле слоў Google, рынак змяняецца натуральным чынам: расце ўплыў штучнага інтэлекту, імкліва развіваюцца новыя рэкламныя фарматы кшталту Connected TV і retail media, а канкурэнты актыўна інвестуюць менавіта ў гэтыя напрамкі. У такой сітуацыі, лічаць у карпарацыі, судовае ўмяшанне «можа толькі нашкодзіць».

Прызнанне кампаніі рэзка кантрастуе з яе публічнай рыторыкай. У маі кіраўнік Google Сундар Пічаі запэўніваў, што пошукавік «адпраўляе трафік на больш шырокае кола сайтаў», а віцэ-прэзідэнт Нік Фокс заявіў, што «вэб як ніколі жывы». Кіраўнікі Google Search таксама сцвярджалі, што ўкараненне ШІ-аглядаў не зніжае колькасць клікаў, а агульны трафік «застаецца стабільным».

У адказ на крытыку прадстаўніца Google Джэкі Бертэ патлумачыла, што гаворка ішла пра рынак «адкрытай банернай рэкламы», а не пра вэб у цэлым. Аднак для выдаўцоў і незалежных сайтаў, якія ўжо фіксуюць падзенне наведвальнасці пасля змяненняў пошукавых алгарытмаў і росту ШІ-інструментаў, гэтае прызнанне стала пацвярджэннем іх апасенняў.