Пакуль тэхналагічныя гіганты ўкладваюць сотні мільярдаў долараў у дата-цэнтры, будаўніцтва жылля і прамысловых аб’ектаў скарачаецца. Эканамісты абмяркоўваюць, ці не выцясняюць інвестыцыі ў ШІ іншыя галіны эканомікі.
Пакуль тэхналагічныя гіганты ўкладваюць сотні мільярдаў долараў у дата-цэнтры, будаўніцтва жылля і прамысловых аб’ектаў скарачаецца. Эканамісты абмяркоўваюць, ці не выцясняюць інвестыцыі ў ШІ іншыя галіны эканомікі.
Гэтую праблему разглядае аглядальніца The Atlantic Эні Лоры. На ейную думку, ШІ-бум не толькі стымулюе эканоміку ЗША, але і можа абыходзіцца ёй дорага: грошы, працоўная сіла і будаўнічыя матэрыялы сыходзяць у тэхналагічную інфраструктуру замест іншых праектаў.
Паказальны прыклад — Далас, які стаў адным з цэнтраў будаўніцтва дата-цэнтраў. У рэгіёне працуюць каля 125 такіх аб’ектаў, яшчэ 19 будуюцца і 53 запланаваны. Гэта падтрымлівае попыт на рабочых і павышае іхныя заробкі.
Але адначасова ў горадзе скарачаецца жыллёвае будаўніцтва. За год колькасць пачатых праектаў індывідуальных дамоў знізілася на 12%, а колькасць кватэр у будуемых шматкватэрных дамах за тры гады ўпала на 43%.
Падобная карціна назіраецца ў маштабах краіны. Паводле разлікаў гарвардскага эканаміста Джэйсана Фурмана, за год выдаткі на будаўніцтва дата-цэнтраў выраслі на 65%. Пры гэтым выдаткі на будаўніцтва жылля і гандлёвых аб’ектаў скараціліся прыкладна на 10%, адукацыйных устаноў — на 13%, офісаў — на 14%, гасцініц — на 15%, а заводаў — на 24%.
Адна з магчымых прычын — канкурэнцыя за рэсурсы. Тэхналагічныя кампаніі прыцягваюць вялікія сумы на будаўніцтва інфраструктуры, павышаючы попыт на крэдыты, зямлю, матэрыялы і кваліфікаваных рабочых. Гэта можа павялічваць выдаткі іншых забудоўшчыкаў і ўскладняць фінансаванне новых праектаў.
Пры гэтым інвестыцыйны бум сапраўды падтрымлівае амерыканскую эканоміку. Oracle, Microsoft, Amazon, Meta і Alphabet у 2026 годзе плануюць выдаць на капітальныя ўкладанні каля $800 мільярдаў. За дзесяцігоддзе гэтая сума вырасла ў восем разоў.
Аднак інвестары ўсё часцей сумняваюцца, ці змогуць такія выдаткі акупіцца. Як піша TechCrunch, Microsoft, Alphabet, Amazon, Meta і Oracle у 2026 годзе прыцягнулі $326 мільярдаў запазычаных сродкаў — утрая больш, чым годам раней.
Адначасова Alphabet адчыталася аб адмоўным свабодным грашовым патоку ў $9,1 мільярда за трэці квартал, а Amazon — аб мінус $42,4 мільярда за апошнія 12 месяцаў. На фоне рэкордных інвестыцый акцыі тэхналагічных кампаній апынуліся пад ціскам.
Яшчэ адно пытанне — карысць дата-цэнтраў для мясцовай эканомікі. Будаўніцтва забяспечвае работай тысячы людзей, але пасля запуску аб’ектам патрабуецца параўнальна мала супрацоўнікаў. Пры гэтым яны спажываюць значныя аб’ёмы электраэнергіі ды вады, ствараючы дадатковую нагрузку на інфраструктуру.
Прамой сувязі паміж ростам інвестыцый у ШІ і спадам жыллёвага будаўніцтва пакуль не даказана. На сітуацыю таксама ўплываюць высокія працэнтныя стаўкі, гандлёвая палітыка і падаражанне будаўнічых матэрыялаў.
Лоры лічыць, што ў выніку амерыканская эканоміка робіць буйную стаўку: адмаўляецца ад часткі патэнцыйных інвестыцый у іншыя галіны дзеля абяцанага росту прадукцыйнасці дзякуючы ШІ. Чым больш рэсурсаў сыходзіць на гэтую тэхналогію, тым больш сур’ёзныя будуць наступствы, калі чаканні не спраўдзяцца.
Релоцировались? Теперь вы можете комментировать без верификации аккаунта.