У ЕС карыстальнікі змогуць адмовіцца ад рэкамендацыйных алгарытмаў Instagram

Прэзідэнт у глабальных пытаннях Meta Нік Клег заявіў, што карыстальнікі змогуць праглядаць сторыс і ролікі толькі ад людзей, на якіх яны падпісаныя, чытаць пасты ў храналагічным парадку, ад самых новых да самых старых. «Яны таксама змогуць праглядаць вынікі пошуку, заснаваныя толькі на словах, якія самі ўводзяць, а не персаналізаваныя спецыяльна для іх на аснове іх папярэдняй актыўнасці і асабістых інтарэсаў».

Кампанія ўнесла змены ў адпаведнасці з законам ЕС аб лічбавых паслугах (DSA), які ўплывае на мадэрацыю кантэнту сацыяльнымі сеткамі. У прыватнасці, DSA патрабуе, каб буйныя анлайн-платформы дазвалялі карыстальнікам адмаўляцца ад атрымання персаналізаваных рэкамендацый. Пра аналагічнае рашэнне ў Еўропе раней абвясціў TikTok. Meta сказала, што выканае патрабаванні DSA пры канцы гэтага месяца.