Тэхнагігант гадамі прымушаў студэнтаў праходзіць неаплачваныя стажыроўкі і не наймаў

Кампанія разаслала выпускнікам больш за дзве тысячы офераў, абяцаючы іх працаўладкаваць, але ўжо два гады трымае ў нявызначанасці. Такі ліст у Мінпрацы Індыі на мінулым тыдні накіраваў мясцовы ІТ-прафсаюз NITES. Там лічаць, што сваімі дзеяннямі Infosys наносіць шкоду патэнцыялу эканамічнага росту Індыі.

Infosys адабрала некалькі тысяч выпускнікоў каледжаў для працаўладкавання на пасады сістэмных і лічбавых інжынераў у часе рэкрутынгавае кампаніі 2022–2023 гадоў. Лісты датаваныя красавіком 2022 года, але студэнты так і не прайшлі анбордзінг.

Замест гэтага іх прымушаюць праходзіць адную стажыроўку за другой —анлайн і ў офісе — і здаваць экзамены проста за магчымасць працаваць у кампаніі. Адная з такіх навучальных сесій працягвалася амаль каляндарны месяц. Пры гэтым грошай студэнтам не плацяць. Маладых спецыялістаў, якія адмовіліся ад стажыроўкі, выстаўлялі за дзверы.

Гендырэктар Infosys Саліл Парэкх у інтэрв’ю індыйскай газеце Press Trust of India запэўніў, што студэнты, якія апынуліся ў падвешанай сітуацыі, усё ж прыступяць да сваіх абавязкаў, але калі менавіта, не ўказаў. Як і прычыны, з якіх інтэграцыя новых супрацоўнікаў у бізнэс-працэсы кампаніі займае столькі часу.

Да канца года Infosys плануе прыняць у свае шэрагі 15-20 тысяч пачаткоўцаў. Ці ўваходзяць у іх лік больш за 2 тысячы кандыдатаў, якія раней атрымалі офер, не ўдакладняецца. Агульная колькасць штату тэхнагіганта на канец 1 квартала складала 315 тысяч чалавек. Узровень цякучасці кадраў кампанія ацэньвае ў 12,7%, а эфектыўнасць супрацоўнікаў — у 85,3%.