«Як нам вярнуць вас назад?» Мэр Сан-Францыска спрабуе прыцягнуць айцішных CEO і ператварыць горад у ШІ-хаб
Мэр Сан-Францыска Дэніэл Луры хоча развіваць горад і перакананы, што ў гэтым яму дапамогуць кіраўнікі тэхналагічных кампаній. У інтэрв’ю TechCrunch ён заявіў, што асабіста тэлефануе прадпрымальнікам і запытвае, што трэба зрабіць, каб вярнуць іх або ўтрымаць у Сан-Францыска.
Акрамя вырашэння такіх праблем, як бяздомнасць, будаўніцтва жылля і добраўпарадкаванне горада, ён мае намер зрабіць яго больш прывабным для бізнесу. У прыватнасці, плануецца зрабіць падатковую сістэму больш «канкурэнтаздольнай» — напрыклад, увесці ільготы для мясцовых кампаній. Таксама мэр вядзе перамовы з вядучымі ШІ-кампаніямі горада аб адкрыцці новых офісаў і правядзенні тут новых ШІ-мерапрыемстваў. Так, Databricks будзе праводзіць фірмовую канферэнцыю ў Сан-Францыска замест Лас-Вегаса, як планавала. Новы офіс у сакавіку тут адкрыла OpenAI.
Таксама Луры хоча, каб ШІ-кампаніі больш інвеставалі ў Сан-Францыска — прычым у розныя сферы, уключаючы культуру і мастацтва. Луры кажа, што OpenAI ужо робіць гэта, але без публічнасці.
Акрамя грошай, Луры патрэбны амбіцыйныя ідэі ІТ-бізнесменаў. Нядаўна тут запусцілі кансорцыум прадпрымальнікаў Partnership for San Francisco, у які ўвайшлі ўдава Стыва Джобса Лорэн Паўэл Джобс, Джоні Айв, Сэм Альтман і іншыя. Ён будзе выступаць як канал камунікацыі паміж бізнес-супольнасцю і ўладамі горада.
Сан-Францыска ўжо некаторы час губляе айцішнікаў. Больш цікавым кірункам для іх стаў Нью-Ёрк, а нядаўна сярод венчурных інвестараў і ІТ-гульцоў стаў актыўна набываць папулярнасць Вашынгтон. Акрамя таго, з-за падатковай палітыкі многія ІТ-кампаніі пачалі пераязджаць, напрыклад, у Тэхас.
Читать на dev.by