Аддзел навін 24 ліпеня 2025, 12:10

Сталяр, барбер, фермер. Айцішнікі распавядаюць, чым зоймуцца, калі ШІ забярэ працу (і збіраюць падушку)

Канал для айцішнікаў у Польшчы задаўся пытаннем — і атрымаў адказы.

Так-так, апытанне было несур’ёзным. А вось некаторыя адказы — нават вельмі. Такім чынам, што ж рабілі б падпісчыкі канала:

З калегамі закранулі тэму. Адзін сказаў, што машыны б старыя рамантаваў, другі б фарбаваць пайшоў, трэці — мэблю збіраць. І пры гэтым усе адказалі чыста з таго, што апошняе рукамі рабілі.
Хацеў бы займацца сталярнымі работамі і вітражамі.
Мэблю б збірала.
Пазногцікі.
Тапер.
«Убер».
Кіроўца, пакуль робатаў на дарогі не пусцілі.
Стала б псіхолагам. Або трамвай вадзіць. І «Жабку» цікава было б адкрыць, так.
Стаў бы кілерам або альфонсам.
Калі б ШІ адабраў працу ў ІТ, то стаў бы арт-ню фатографам.
Барбер, бармэн.
Варыянтаў некалькі: пайшоў бы вучыцца на доктара; або ў службу дастаўкі; стаў бы электрыкам; або гарадскім вар’ятам.
Вярнуўся б у медыцыну або ўніверсітэт.
Вярнуўся б на завод электрыкам, скончыў бы там жа, дзе і пачынаў.
Друкаваць і фарбаваць кастомныя калекцыйныя фігуркі. А стоп, я і так іх раблю, гэтую працу ШІ дакладна не забярэ.
Эх, прыйшлося б канал на YouTube заводзіць, HEMA пачынаць папулярызаваць і індывідуалкі прадаваць.
Чакаў бы таскаў на выпраўленне ШІ-багаў.
Стварэннем ШІ-кантэнту, ужо пачала патроху вучыцца.
Тэсціраванне або нешта блізка айцішнае. Слаба ўяўляю сябе ў іншых спецыяльнасцях. Магчыма, буду беспрацоўным.
Я выкладаю англійскую для ІТ, і кожны год мае студэнты-айцішнікі пытаюцца, калі ж ужо ШІ забярэ ў мяне працу. Я смяюся і працягваю рабіць сваю справу. А так — пайшла б стрыгчы/фарбаваць людзей, арганізоўваць падарожжы пад розны бюджэт/інтарэсы. Ну або жывёл ратавала б.
Узяў бы ў доўг біткоіна пад залог «эфіра» і зрабіў стаўку на перамогу Рэала ў Лізе Чэмпіёнаў 2026. Або перамога і мільёны, або інфаркт і страхоўка. Нейкія такія ідэі.
Фермерства, пэўна.
Пайду сонечныя панэлькі ставіць з акумулятарамі энергіі (пішу тут пра свой пераход на сонечныя панэлі). Пячы хлеб з грэчкі. Куплю ўчастак зямлі і буду вырошчваць маліну і іншае. Можа, настаўнікам для дзяцей стану.
Калі зусім ІТ памерла, то пайду ў кірунак садоў. Зраблю класны садовы цэнтр з раслінамі і паслугамі вакол гэтага. Але калі мая тэхнічная прафесія вымерла, а галіна жывая, то знайду сумежную і адаптуюся. P. S. І так, мае інвестыцыі будуць дапамагаць.

А вось яшчэ такі адказ:

— Адна з самых класных спраў, што можна зрабіць да таго, як гэта здарыцца, асабліва з нашымі даходамі ― гэта мець і назапашваць добрую фінансавую падушку. З аднаго боку гэта спакой на некалькі месяцаў / гадоў у залежнасці ад аб’ёму, а, па-другое, гэта ж падушка, будучы ў ETF, можа генераваць пасіўны даход нешта кшталту 3,5%-4% у год ад памеру капіталу.

То бок гэта дае альбо цалкам бесклапотны перыяд, калі можна не працаваць увогуле, альбо можа моцна зніжаць суму, якую патрабавалася б штомесяц зарабляць для падтрымання камфортнага ўзроўню жыцця.

У выпадку маёй сям'і, калі жыць увогуле без зніжэння ўзроўню выдаткаў і ў тым жа месцы, то нам з жонкай было б дастаткова, акрамя наяўнасці ETF, дадаткова зарабляць у раёне $1500 на дваіх чыстымі, што дасягальна ледзь не на любой працы. Або нават значна менш ($800 на дваіх), калі перабрацца ў больш танны горад, або нават у межах таго ж горада падрэзаць выдаткі, каб засталіся толькі камуналка, ежа і бытавыя і іншыя выдаткі.

У цэлым, ёсць усе магчымасці, каб моцна дэмпінгаваць на рынку ў выпадку такога сцэнару.

А вы?