«Код поспеху Беларусі»: ПВТ даў справаздачу з нагоды 20-годдзя

Як раней паведамляла старшыня наглядчай рады ПВТ Ганна Рабава, зараз у яго ўваходзіць 1050 кампаній. У суме яны налічваюць каля 60 тысяч спецыялістаў у прадукце і аўтсорсе.

Рэзідэнты ПВТ забяспечваюць 20% экспарту паслуг Беларусі — «у сярэднім па $2,5 млрд у год за апошнюю пяцігодку, і фармуюць каля 3% ВУП», гаворыцца ў публікацыі.

Нагадаем, на піку ў 2021 годзе экспарт ПВТ складаў $3,2 млрд, а ў 2022-м упершыню ў яго гісторыі знізіўся — да $2,7 млрд. Доля ПВТ у агульным экспарце паслуг Беларусі ў гэтых гадах складала 30%. А доля ў ВУП — 4,8% і 4% адпаведна.

У святочным посце гаворыцца, што ПВТ сканцэнтраваны і на ўнутраным рынку, дзе ўжо ўкаранёна шмат уласных рашэнняў. За 2024 год рэзідэнты ПВТ рэалізавалі ў Беларусі ІT-прадуктаў і паслуг на каля 2 млрд рублёў. Таксама адзначаецца, што ПВТ стаў калыскай мноства стартапаў і распрацовак, якія паспяхова канкуруюць у тым ліку на міжнародным узроўні.

«Парк высокіх тэхналогій — гэта сімвал таго, на што здольная Беларусь, калі аб’ядноўваюцца талент, вера і імкненне да будучыні. 20 гадоў таму мы пачалі пісаць код новай эпохі — і сёння ён працуе, развіваецца і натхняе.

ПВТ — гэта гонар Беларусі, наш агульны поспех і доказ таго, што патрыятызм можа быць лічбавым, а прагрэс — нацыянальнай ідэяй», — такімі словамі завяршаецца пост.