Замежныя ІТ-кампаніі з «недружалюбнага» спісу сыходзяць з Беларусі

Што за спіс?

Гэта пералік юрыдычных асоб з акцыянерамі з «недружалюбных краін». Паводле рашэння ўрада, такім акцыянерам забаранілі адчужаць долі (акцыі) у статутных фондах юрыдычных асоб у РБ, якія належаць ім,  без спецыяльнага дазволу Мінфіна.

Першая версія спісу з’явілася яшчэ летась у ліпені — у мэтах выканання ўказа «Пра дадатковыя меры забеспячэння стабільнага функцыянавання эканомікі». У спіс уключылі 190 кампаній, у тым ліку з ІТ-сектара: «ЭПАМ Сістэмз», «Гейм Стрым», IBA Gomel Park, ТАА «АйЦіСапортМі».

Увосень ініцыятыва ўладаў атрымала працяг. Новым указам Лукашэнкі № 386 ад 31 кастрычніка акцыянерам «з недружалюбных дзяржаў» забаранілі рэарганізацыю юрыдычных асоб і выхад з іх. 

А сёлета ў студзені ўрад пайшоў далей і новай пастановай № 54 пашырыў спіс у 10 разоў — да амаль 1900 кампаній. У ім апынуліся і невялікія кампаніі (са штатам да 20 чалавек), і некалькі дзясяткаў вядомых буйных і сярэдніх ІТ-кампаній.

Поўны змест новай пастановы ўрад схаваў пад грыфам «для службовага карыстання». 

Магчыма, пашырэнне спісу было ў тым ліку рэакцыяй уладаў на масавы сыход ІТ-кампаній з Беларусі летась. 

Пры гэтым для ліквідацыі кампаній са спісу ніякіх абмежаванняў няма. 

Так, яшчэ летась у снежні ліквідацыю кампаніі ў Мінску запусціла амерыканская Apptio, якая набыла ў 2021 годзе беларускую прадуктовую кампанію Targetprocess. Паводле слоў экс-супрацоўнікаў, яшчэ ўвесну 2022 года мінскую каманду рэлакавалі ў Польшчу — у кракаўскі офіс Apptio. Частка супрацоўнікаў працуе аддалена з іншых польскіх гарадоў.

Ад красавіка гэтага года яшчэ адная вядомая амерыканская кампанія, Softeq Development, таксама афіцыйна ліквідуе беларускую юрыдычную асобу. У мінскім офісе працавала каля 280 спецыялістаў. Паводле слоў супрацоўнікаў, закрыць офіс распрацоўкі ў Мінску топ-менеджмент Softeq Development вырашыў пасля 24 лютага 2022 — пачатку поўнамаштабнага ўварвання Расіі ва Украіну.

Амерыканцы і брытанцы закрываюць бізнэс

Мы знайшлі і іншыя кампаніі са спісу, якія вырашылі закрыць бізнэс у Беларусі і сысці з краіны. Дарэчы, гэтых кампаній больш няма ў спісе рэзідэнтаў ПВТ. 

«Кайрыба Інжынірынг»

Офіс распрацоўкі амерыканскай Kyriba — міжнароднага правайдара воблачных рашэнняў у галіне фінансавага кіравання. Сярод кліентаў Kyriba — вядомыя транснацыянальныя карпарацыі, у прыватнасці, Amazon, Uber, Tesla, Auchan.

R&D офіс Kyriba ў Мінску з’явіўся ў 2018 годзе. Яго стварылі на базе падраздзялення кампаніі, адкрытага сумеснага з Belhard у 2017 годзе. У беларускім офісе працавала каля 100 чалавек. У ліквідацыі — ад снежня 2022. 

«Тэаліум Бел»

Офіс распрацоўкі амерыканскай кампаніі-аднарога Tealium (ацэнка 1,2 мільярда долараў). 

Асноўны прадукт — big data-платформа, якая дапамагае сэрвісам і арганізацыям збіраць і аналізаваць даныя сваіх кліентаў з дапамогай вэб-, мабільных, аўтаномных прылад і прылад IoT. Сярод партнёраў кампаніі: Facebook, Sony, T-Mobile, Hulu, Uber, American Airlines.

Падраздзяленне ў Беларусі з’явілася ўзімку 2020 года. На працягу двух гадоў кампанія збіралася наняць да 8 інжынерных каманд. Усяго ў Беларусі працавала каля 70 супрацоўнікаў. Каманда займалася распрацоўкай вэб-платформы для кіравання інфармацыяй пра наведвальнасць сайтаў кампаній. У ліквідацыі — ад красавіка 2023.

«Дэльтатрэ»

Цэнтр распрацоўкі брытанскай «Дельтатрэ Груп Лімітэд».

Кампанія распрацоўвае софт для арганізацыі і абслугоўвання прамых трансляцый міжнародных спартовых мерапрыемстваў. У Беларусі кампанія працавала над платформай AXIS. Яна дазваляе хутка разгортваць серверы для абслугоўвання кліенцкіх праграм, апрацоўкі карыстальніцкіх даных, размеркавання медыя кантэнту. У ліквідацыі — ад лютага 2023. 

«Віякод Бел»

Цэнтр распрацоўкі амерыканскай VIAcode.

Кампанія займаецца распрацоўкай бізнэс-праграм і софту. Асноўным заказчыкам з’яўляецца Microsoft. У Беларусі працавала каля 20 чалавек. У ліквідацыі — ад сакавіка 2023. 

«Фрэшлі Дата»

Цэнтр распрацоўкі софту амерыканскай кампаніі Freshly.

Распрацоўвала софт для аўтаматызацыі бізнэс-працэсаў у сферы электроннага гандлю з выкарыстаннем воблачных тэхналогій і штучнага інтэлекту. У Беларусі працавала каля 25 чалавек. У ліквідацыі — ад лютага 2023. 

«Сайдвэйс 6 Дэвелапмент»

Распрацоўшчык SaaS платформы, якая дапамагае буйным арганізацыям шукаць інавацыйныя ідэі аптымізацыі працы, зніжаць страты і знаходзіць новыя крыніцы даходу. У кампаніі ёсць офісы ў Нью-Ёрку і Лондане. У Беларусі працавала каля 20 чалавек. У ліквідацыі — ад сакавіка 2023. 

«Інэвэйт Юрап»

Цэнтр распрацоўкі міжнароднай групы кампаній ENAVATE. Кампанія распрацоўвала рашэнні для аўтаматызацыі бізнэс-працэсаў. У Беларусі працавала каля 20 чалавек. Сёлета ў маі была цалкам ліквідаваная. 

Беларусы — таксама

Бізнэс закрываюць не толькі замежныя кампаніі з «недружалюбнага» спісу юрыдычных асоб, але і беларускія кампаніі, для якіх няма абмежаванняў. 

«Філін Дзіджытал»

VR-кампанія, займаецца распрацоўкай прадуктаў з выкарыстаннем VR/AR і real-time 3D-графікі. Сузаснавальнікам і дырэктарам кампаніі з’яўляецца Павел Фірсаў, які раней паспеў папрацаваць на беларускім ТБ і ў Wargaming. 

У мінскім офісе кампаніі працавала 20+ супрацоўнікаў. У 2020 годзе VR-праект беларусаў атрымаў узнагароду ў намінацыі Best Game на штогадовым форуме VR Days у Амстэрдаме. У 2021 годзе праект трапіў на Канскі кінафестываль. У ліквідацыі — ад мая 2023.

«Джэт Бі Ай» 

Распрацоўшчык софту, воблачных рашэнняў і сэрвісаў. Офісы кампаніі адкрытыя ў Польшчы, Украіне, Ірландыі. У Беларусі працавала каля 80 чалавек. У ліквідацыі — ад сакавіка 2023. 

«Кіндэрсонг»

Распрацоўшчык мабільных праграм і софту на заказ. У ліквідацыі — ад снежня 2022. 

«ПЦІ Салюшнс»

Кампанія займалася распрацоўкай софту. Яе стварыў экс-дырэктар мінскай PandaDoc Зміцер Рабцэвіч. На пачатку верасня 2020 года яго разам з трыма іншымі супрацоўнікамі кампаніі затрымалі па справе PandaDoc. Пасля выхаду з СІЗА ён зарэгістраваў новую кампанію. Юрыдычны адрас «ПЦІ Салюшнс» супаў з юрыдычным адрасам PandaDoc (была ліквідаваная ў 2021-м). Пра «ПЦІ Салюшнс» няма ніякай інфармацыі (штат, праекты, планы), за выключэннем сферы дзейнасці. У ліквідацыі — ад лютага 2023. 

«Хітбокс»

Распрацоўшчык гульнявых free-to-play праектаў для платформаў iOS і Android. Кампанія супрацоўнічала з такімі вядомымі паблішарамі як Voodoo, SayGames, TabTale, ZPlay. У Беларусі працавала больш за 10 чалавек. У ліквідацыі — ад студзеня 2023. 

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.

У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.