Алеся Чапкевич world 22 кастрычніка 2026, 12:47

«Літаральна ўвесь»: кіраўніца ключавога аддзела Anthropic заявіла, што Claude піша 100% кода ў ейнай камандзе

Кіраўніца аднаго з галоўных падраздзяленняў Anthropic Кейтлін Лес заявіла, што Claude Code тут цалкам узяў на сябе напісанне кода.

Пакінуць каментарый

«Літаральна ўвесь»: кіраўніца ключавога аддзела Anthropic заявіла, што Claude піша 100% кода ў ейнай камандзе

Кіраўніца аднаго з галоўных падраздзяленняў Anthropic Кейтлін Лес заявіла, што Claude Code тут цалкам узяў на сябе напісанне кода.

Лес узначальвае групу платформеннай інжынерыі, якая адказвае за базавыя сервісы, інструменты распрацоўкі і прадуктавую інфраструктуру — па сутнасці, за ўнутраную сістэму Anthropic. На канферэнцыі ObservabilityCON ад Grafana Labs яна адзначыла, што ў ейнай камандзе з 200 чалавек рукамі код больш ніхто не піша.

«Калі браць нашу каманду і тое, як мы будуем і падтрымліваем сістэмы — увесь код за нас піша Claude. Вось літаральна ўвесь», — сказала Лес.

Такі акцэнт на Claude Code дазваляе Anthropic трымаць сціплы штат напярэдадні IPO, у ходзе якога кампанію могуць ацаніць амаль у $2 трлн. Пры гэтым у трэцім квартале рост выручкі ў яе запаволіўся, і каб захаваць такую гіганцкую ацэнку, Anthropic трэба пераканаць рынак пераходзіць на ШІ-распрацоўку на свой прыклад, адзначае Business Insider.

Лес удакладніла, што супрацоўнікі ў ейным аддзеле займаюцца праектаваннем архітэктуры сістэм і логікі праверак, а ўласна кодынг дэлегаваны Claude. Для прыкладу яна прывяла пераезд ключавой кодавай базы з Python на Rust — інжынеры прыдумалі метад фінальнай праверкі, а ўсю асноўную працу выканаў ШІ.

«Брудную працу па зборцы модуляў, іх маніторынгу і праверцы функцыянальнасці цалкам выконвалі агенты», — патлумачыла Лес.

Цяпер Anthropic ужо дазваляе ШІ-агентам аўтаномна выпраўляць тэсты без удзелу чалавека. На фоне паляпшэння мадэляў за апошні год кіраўніцтва разглядае магчымасць даверыць агентам самастойна ўносіць праўкі наўпрост у асноўную кодавую базу.

«Тэхнічныя кіраўнікі асцерагаюцца такіх крокаў і заклікаюць да асцярожнасці, але гэты бар’ер паступова рушыцца», — адзначыла Лес.

Гісторыя з платформенным аддзелам — не ізаляваны выпадак, а курс усёй Anthropic. Са свежай справаздачы кампаніі вынікае, што чым больш задач бяруць на сябе ШІ-агенты, тым менш яна наймае джунаў. Яшчэ ў траўні Anthropic прызналася, што Claude піша больш за 80% увогуле ўсяго прадакшэн-кода кампаніі.