Маск апусціў 500-мільярдны праект OpenAI і назваў Альтмана ашуканцам

Softbank, OpenAI, Oracle і блізкаўсходні фонд MGX плануюць па першым часе ўкласці ў ініцыятыву $100 млрд, а найбліжэйшымі чатырма гадамі — $500 млрд. Маск настроены скептычна: ён нібыта з вартых даверу крыніц ведае, што ў SoftBank забяспечана пад праект значна менш за $10 млрд. У асобных пастах ён назваў гендырэктара OpenAI Сэма Альтмана хлусам і ашуканцам.

Альтман у адказ выказаў павагу да здзяйсненняў апанента і назваў яго «адным з самых натхняльных прадпрымальнікаў нашага часу». У іншым пасце ён абверг словы Маска наконт грошай і не прамінуў укалоць яго: «Я разумею: тое, што добра для краіны, не заўсёды выгадна тваім кампаніям».

Журналіст CNBC спытаў наконт слоў Маска гендырэктара Microsoft Сацью Надэлу. Ён адзначыў, што можа гаварыць толькі за тыя $80 млрд, якія мае ў сваім распараджэнні.

Між тым новы кансультатыўны орган самога Маска ўжо спрабуе знізіць чаканні грамадскасці ад сваёй працы. Ведамства DOGE, якое мелася правесці ацэнку эфектыўнасці амерыканскага ўрада і паменшыць яго выдаткі, возьме на сябе функцыі HR і тэхпадтрымкі — яно зоймецца абнаўленнем софту і скарачэннем штату дзяржслужачых. Таксама супраць DOGE ўжо пададзена некалькі судовых пазоваў.