Не ўсе айцішнікі баяцца ChatGPT. Ці варта?

Але ёсць ІТ-спецыялісты, якія наадварот радыя ChatGPT і сэрвісам на базе АІ. Гэтыя тэхналогіі павышаюць эфектыўнасць праграмістаў і дазваляюць пісаць якаснейшы код хутчэй.

Эксперты галіны сцвярджаюць, што інструменты накшталт ChatGPT і Copilot ад GitHub шмат у чым спросцяць навучанне праграмаванню і знізяць парог уваходу ў айці. Гэта дапаможа вырашыць праблему хранічнага недахопу кадраў у галіне.

«Распрацоўшчыкі, платформенныя і DevOps-Інжынеры імкнуцца аўтаматызаваць як мага больш руцінных задач і вызваліцца для задач, якія патрабуюць больш высокаўзроўневага мыслення. АІ можа дапамагчы аўтаматызаваць многія з гэтых руцінных задач», — адзначаюць гульцы рынку. Штучнаму інтэлекту яшчэ вельмі далёка да крэатыўнасці чалавека, і гэта той кірунак, дзе могуць рэалізоўвацца прасунутыя кодары, скінуўшы з сябе лішняе.

Прафесійныя кодары і не толькі часта шукаюць адказы на пытанні на спецыялізаваных форумах накшталт Stack Overflow, а самі кодары жартуюць, што навучанне праграмаванню — шмат у чым навучанне мастацтву капіпасцінгу. ChatGPT — усяго толькі яшчэ адзін памочнік, здольны генераваць код на запыт улёт.

Таксама эксперты лічаць, што штучны інтэлект робіць тэхналогіі значна даступнейшымі для кампаній, якія менш падкаваныя ў гэтым плане. А гэта прывядзе да росту попыту на спецыялістаў, якія будуць укараняць і падтрымліваць АІ-інструменты ў іх.

Тым не менш ChatGPT і падобныя тэхналогіі могуць адчувальна паўплываць на прафесію распрацоўшчыка ў сярэдне- і доўгатэрміновай перспектыве, паколькі робяцца ўсё разумнейшыя, зніжаючы патрэбу ў простых кодарах. Але, з іншага боку, павышаюць важнасць спецыялістаў, якія будуць забяспечваць стабільнае функцыянаванне АІ-сістэм і збіраць фрагменты кода чатботаў у працоўныя прадукты. А значыць, ІТ-прафесіяналы будуць запатрабаваныя яшчэ вельмі доўга.