«У Беларусі велізарны патэнцыял». Нямецкая кампанія спрабуе абысціся без звальненняў у Мінску

Невялікая нямецкая Кампанія North IT Group (30+ чалавек) перавяла частку мінскай каманды на паўстаўкі, частку адправіла ў неаплачваны адпачынак. Пра гэта dev.by на ўмовах ананімнасці расказалі некалькі супрацоўнікаў кампаніі. Кіраўніцтва North IT Group сцвярджае, што ўсё не зусім так. Разбіраліся.

North IT Group працуе ў Беларусі ад снежня 2018 года. Кампанія займаецца распрацоўкай вэб-сайтаў і праграм. У мінскім офісе — 30-40 чалавек. Цяпер у кампаніі праблемы.

— Людзей адправілі ў адпачынкі за свой кошт на розныя тэрміны — ад тыдня да месяца (некаторыя кажуць пра два месяцы — заўв. dev.by). Гэта было масава. Чуў, што адправілі ў неаплачваны адпачынак каманду мабільнай распрацоўкі, каманду бэкэнду, — расказаў dev.by адзін з супрацоўнікаў. — Замест адпачынку альбо пасля адпачынку некаторых супрацоўнікаў перавялі на няпоўны працоўны дзень (4 гадзіны) на паўстаўкі. Так, у прыватнасці, адбылося са мной.

Калі такія варыянты не задавальнялі, можна было звольніцца. Пры звальненні прапануецца «выхадная дапамога», роўная заробку за два тыдні. Па выплаце адпускных/заробку пасля звальнення — усё добра, наколькі я ведаю.

Паводле слоў суразмоўцаў, з якімі ўдалося пагутарыць dev.by, праблемы ўзніклі праз дэфіцыт праектаў і новых заказчыкаў, а таксама праз складанасці з плацяжамі з-за мяжы. «Кампаніі вінныя шмат грошай розныя заказчыкі», — растлумачыў адзін з супрацоўнікаў, не раскрываючы падрабязнасцей. Кіраўніцтва кампаніі, паводле ягоных слоў, паабяцала развязаць пытанні на працягу пары месяцаў. 

Адзін з суразмоўцаў сцвярджае, што ў кампаніі не адбылося масавых звальненняў нягледзячы на праблемы.

— У нас шмат людзей з невялікім досведам, студэнты. Яны згаджаюцца сыходзіць у неаплачваны адпачынак, бо цяпер складана знайсці новую працу. Пра выпадкі добраахвотнага звальнення я не чуў. Аналагічная сітуацыя з тымі, каго перавялі на паўстаўкі. Не чуў, каб хтосьці звольніўся і не пагадзіўся на скарачэнне заробку.

Іншы супрацоўнік расказаў, што частка мінскай каманды шукае варыянты з новай працай.

— За ўвесь час маёй працы ў кампаніі такая сітуацыя здарылася ўпершыню. Мы з калегамі ўжо разглядаем прапановы і актыўна ходзім на сумоўі.

Што тычыцца альтэрнатыўнага варыянту — рэлакейту, то, паводле слоў суразмоўцаў, яшчэ ўзімку некалькі чалавек змаглі пераехаць у офіс кампаніі ў Германіі. «Але цяпер пра рэлакацыю ніхто не кажа».

CEO: «Звольнілі толькі аднаго»

dev.by удалося звязацца з CEO North IT Group Штэфанам Хофманам. Вось што ён адказаў на пытанне пра сітуацыю ў кампаніі. 

 — У 2023 годзе нам давялося расстацца толькі з адным супрацоўнікам праз нездавальняючую працу і, як вынік, нездаволенасць кліентаў.

З іншымі калегамі, якія пацярпелі ад цяперашняй сітуацыі, мы дамовіліся, што яны могуць выбраць скарочаны працоўны дзень у летні перыяд або перайсці на іншыя праекты/задачы ўнутры кампаніі.

Акрамя таго мы далі магчымасць супрацоўнікам прайсці перападрыхтоўку/навучанне за кошт кампаніі. Таксама трэба адзначыць, што кампанія не касавала і не скарачала бонусаў да іншых выплат супрацоўнікам у Беларусі.

North IT Group Ltd працягвае разглядаць Беларусь як вельмі прывабную лакацыю, сёлета кампанія інвеставала значныя рэсурсы ў офісныя памяшканні і абсталяванне.

Мы цвёрда верым, што Беларусь мае велізарны патэнцыял, і мы па-ранейшаму наладжаныя на актыўны ўдзел у развіцці ІТ-індустрыі ў гэтым рэгіёне.

Кантэкст

За 2022–2023 гады некалькі дзясяткаў ІТ-кампаній закрылі/прадалі свой бізнэс у Беларусі і сышлі з краіны. Большасць з іх прапанавала супрацоўнікам опцыю рэлакейту і ўзяла на сябе частку выдаткаў.  (Толькі 14% удзельнікаў нашага рэсёрчу ў ліпені 2022 — 5000 анкет — адзначылі, што ў іх кампаніях няма рэлакейту.)

У гэтым спісе сёння як вядомыя кампаніі з беларускімі каранямі (Flo, Wargaming, Gurtam, Wannaby, OneSoil), так і замежныя (WorkFusion, Appodeal, Softeq Development, Arteza, EIS Group, Playrix).

Большасць ІТ-кампаній з топ-50 пакуль захавалі бізнэс у Беларусі, але колькасць супрацоўнікаў, якія працуюць у офісах у РБ, за апошнія паўтара года скарацілася, паводле нашых ацэнак, у 1,5-2 разы. Напрыклад, найбуйнейшая ІТ-кампанія Беларусі EPAM «страціла» прыкладна палову штату. Амаль на столькі ж скарацілася беларуская каманда iTechArt. Мінскі офіс Exadel скараціўся амаль у 5 разоў.

Паводле звестак афіцыйнай статыстыкі і нашых разлікаў ад студзеня 2022 года ІТ-сектар страціў ужо каля 20 тысяч спецыялістаў. Тут мы параўналі маштабы дзвюх хваляў рэлакейту — пасля 2020-га і пасля 24 лютага 2022.

dev.by, як і іншым сумленным медыя, сёння вельмі складана: рэдакцыя працуе па-за межамі краіны, а нашыя рэкламныя даходы скараціліся ў некалькі разоў. Але мы даем рады — з вашай дапамогай. Гэта вы дзеліцеся з намі інфанагодамі, думкамі, досведам, часам і ўвагай. А 210 чытачоў падтрымліваюць нас данатамі.

У 2023 годзе мы хочам сабраць 1000 чытачоў-падпісчыкаў. 

Дапамагчы нам можна праз Patreon. 

З Беларусі — праз Donorbox.

І яшчэ крыптой, тут гаманцы.

Дзякуй, што прачыталі гэтае паведамленне.