Геймдэў-гігант Playrix сышоў. Цяпер студыя належыць беларусу
Пра намер канчаткова сысці з Беларусі і Расіі яшчэ ў кастрычніку (верагодна, у сувязі з абвяшчэннем у Расіі мабілізацыі) заявілі заснавальнікі Playrix Ігар і Зміцер Бухманавы.
Беларуская «Плэйрыкс Бі Уай» змяніла назву на «БРЫГ Студыа». Статутны фонд новай кампаніі на гэты момант складае 3,4 мільёна рублёў, або каля 1,4 мільёна долараў. Такая інфармацыя ёсць у АДР.
Уладзімір Акімаў з’яўляецца адзіным уласнікам кампаніі, яму належыць 100% долі. У LinkedIn мы вывучылі профілі людзей з такім жа імем і прозвішчам. Гаворка можа весціся пра CEO і заснавальніка іншай мінскай студыі (рэзідэнта ПВТ), якая стварае Full CG ролікі, а таксама займаецца распрацоўкай мабільных гульняў на Unity. Аднак прадстаўнікі кампаній не адказалі на запыт dev.by наконт каментара.
Playrix зарэгістравала кампанію ў Беларусі ў снежні 2018 года. У 2019 годзе кампанія ўступіла ў ПВТ і інвеставала ў капітал беларускай студыі Vizor Games. У мінскім офісе на пачатку 2022 года працавала каля 100 чалавек.
Вясной-летам у мінскім офісе Playrix прайшлі звальненні. Кампанія заявіла, што гэта звычайныя працоўныя працэсы, гаворка пра закрыццё офіса не вядзецца. Але ўжо ўвосень заснавальнікі Ігар і Зміцер Бухманавы заявілі, што Playrix сыходзіць з Беларусі і Расіі. Кампанія закрые ўсе свае офісы, а таксама спыніць аперацыйную дзейнасць у гэтых краінах.
Playriх заснаваная ў 2004 у расійскай Волагдзе. Галаўны офіс размешчаны ў Дубліне. У студзені 2019 года 100% Playrix перайшлі да кіпрскай «Рым’ют Холдынгс Лімітэд». У верасні 2020 года кампанія ацэньвалася ў $7,8 млрд.
У Playrix працуе каля 4000 супрацоўнікаў. Штодзённая аўдыторыя праектаў — больш за 30 мільёнаў чалавек. Гадавая выручка — $2,7 млрд. Playrix уваходзіць у топ-5 найбуйнейшых паблішараў у свеце.
Читать на dev.by