З'явіліся чуткі пра хуткі рэліз супермагутнай мадэлі OpenAI. Альтман усё адмаўляе

Раней крыніцы паведамлялі, што Orion будзе ў 100 разоў магутнейшая за GPT-4 і будзе навучацца на сінтэтычных даных, пададзеных іншай мадэллю OpenAI — o1 (Strawberry). Orion, як мяркуецца, будзе даступная спачатку абмежаванай колькасці партнёраў OpenAI, уключаючы Microsoft, перш чым інтэгравацца ў ChatGPT.

Прадстаўнік OpenAI заявіў, што ў кампаніі «няма планаў выпускаць мадэль пад кодавым імем Orion сёлета». Замест гэтага OpenAI абяцае «выпусціць шмат іншых выдатных тэхналогій». Нягледзячы на абвяржэнне, кампанія не выключае магчымасці выпуску новай мадэлі ў будучыні, але, магчыма, менш магутнай, чым Orion.

Генеральны дырэктар OpenAI Сэм Альтман назваў навіну пра выпуск Orion «фэйкам». Аднак ягоны пост у X са згадваннем «зімовых сузор’яў», магчыма, намякаў на Orion: сузор’е, найбольш прыкметнае ў перыяд ад лістапада да лютага.

Адмова ад выпуску Orion адбываецца на фоне значных змен у OpenAI. Кампанія нядаўна закрыла раўнд фінансавання на $6,6 мільярда, што патрабуе рэструктурызацыі ў камерцыйную арганізацыю. Акрамя таго, стартап сутыкнуўся з сыходам ключавых супрацоўнікаў, уключаючы тэхнічную дырэктарку Міру Мураці, дырэктара па даследаваннях Боба Макгру і віцэ-прэзідэнта па посттрэнінгу Барэта Зофа.